Harçeqanidən bürünc medal, Əzizova 5-ci oldu
Rio-de-Janeyrodakı Yay Olimpiya Oyunları davam edir.
Azerisport.az xəbər verir ki, yarışların 14-cü günündə - avqustun 19-da taekvondo yarışlarında mübarizəyə qoşulan son Avropa çempionu Milad Beigi Harçeqaninin çıxışı uğurlu olub.
Turnirdə 80 kiloqram çəki dərəcəsində kişilərin mübarizəsində yarışan taekvondoçumuz 1/8 final mərhələsindəki ilk görüşündə Mali idmançısı İsmael Kulibali ilə qarşılaşıb. Son iki dünya çempionatının mükafatçısı olan afrikalı idmançı ilə döyüşdə rəqibini 13:6 hesabı ilə məğlub edən təmsilçimiz 1/4 final mərhələsinə yüksəlib.
İdmançımız 1/4 finalda iranlı Mehdi Xodabaxşiyə 17:5 hesabı ilə qalib gələrək yarımfinal mərhələsinə adlayıb. Amma təəssüf ki, yarımfinalda britaniyalı Lutalo Muhammada 7:12 hesabı ilə məğlub olan Azərbaycan təmsilçisi Rio-2016-nın bürünc medalı uğrunda mübarizə apamaq məcburiyyətində qalıb.
Harçeqani bürünc medal uğrunda döyüşdə polşalı Pyotr Pazinski üzərində inamlı (12:0) qələbə qazanaraq Rio-2016-nın bürünc medalına sahib olub.
Avqustun 19-da taekvondo yarışlarında digər təmsilçimiz Fəridə Əzizova da dayanq üzərinə çıxıb. Turnirdə 67 kiloqram çəki dərəcəsində qadınların mübarizəsində yarışan taekvondoçumuz Fəridə Əzizova 1/8 final mərhələsində ABŞ idmançısı Payqe Makferson ilə döyüşüb. London-2012-nin və dünya çempionatının gümüş medalçısı ilə görüşdə rəqibinə 6:5 hesabı ilə qalib gələn təmsilçimiz 1/4 final mərhələsinə adlayıb. O, 1/4 finalda Asiya çempionatının mükafatçısı özbəkistanlı Niqora Tursunqulova ilə döyüşdə 5:1 hesabı ilə qalib gələrək növbəti mərhələyə vəsiqə qazanıb. Amma Əzizova yarımfinalda 2015-ci ilin dünya çempionu Koreya Respublikasının təmsilçisi Hyeri Oha 5:6 hesabı ilə uduzub. Taekvondoçumuz bürünc medal uğrunda döyüşdə də rəqibi Afrika çempionatının qalibi kot-divuarlı Gbagbi Kristelle Rus Marieyə 1:7 hesabı ilə məğlub olub. İdmançımız Olimpiya Oyunlarını beşinci pillədə başa vurub.
