Azərbaycan AÇ-də İtaliya və İspaniya ilə üz-üzə
18 avqust 2011 18:35
Qadın otüstü hokkeyçilərimiz avqustun 20-dən 28-dək Almaniyanın Münhenqladbax şəhərində Avropa çempionatında iştirak edəcək. Azerisport.az xəbər verir ki, qitənin ən güclü 8 yığmasının mübarizəsi həm də 2012-ci il London Yay Olimpiya Oyunlarına vəsiqə qazanmaq imkanı verəcək.
"A" qrupuna daxil olan milli komandamız Avropa çempionatında ilk oyununu avqustun 20-də Hollandiya hokkeyçilərinə qarşı keçirəcək. Bir gün sonra baş məşqçi, koreyalı Kim Giyesoonun rəhbərlik etdyi yığmamız İtaliya təmsilçiləri ilə qarşılaşacaq. İlkin mərhələdə son oyunumuz avqustun 23-də 3 il əvvəl Bakıda keçirilən Pekin Yay Olimpiya Oyunlarının təsnifat yarışının finalında uduzduğumuz İspaniya millisi olacaq.
Digər qrupda isə Almaniya, İngiltərə, İrlandiya və Belçika yığmaları yarışacaq. Bir günlük istirahətdən sonra qruplara müvafiq yerləri tutanlar bir-biri ilə çarpaz üsulla qarşılaşacaq. Yəni - 4A - 3B, 3A - 4B, 2A-1B, 1A - 2B.
Avqustun 26 -sına təyin olunmuş fasilədən bir gün keçəndə Avropa çempionatının yüksək divizionunda qalmaq üçün dördlərin turnirində son oyunlar ilkin mərhələdə tutduqları yerlərə uyğun olaraq 4A- 4B və 3A-3B komandaları arasında keçiriləcək. Həmin matçların yekununda ən pis göstəriciyə malik milli komanda elitanı tərk edəcək. Onun əvəzinə isə növbəti - 2013-cü il mövsümündə bu günlərdə Ukraynanın Vinnitsa şəhərində keçirilən "Trofi" yarışlarında 1-ci yeri tutan Çexiya Respublikasının yığması mübarizəyə qoşulacaq. Yarışların sonuncu günü - avqustun 27-də baş tutacaq final oyunlarında Avropa çempionatının mükafatçıları da müəyyənləşəcək.
Bir daha xatırladırıq ki, cari çempionatın yekununda ilk iki yeri tutanlar London Yay Olimpiya Oyunlarına vəsiqə qazanacaqlar. Əgər İngiltərə millisi 1-ci yerə layiq görülərsə, o zaman Avropa çempionatının bürünc mükafatçısı da Londona gedə bilər.
Azərbaycan hokkeyçiləri qitə çempionatına hazırlıq üçün nəzərdə tutulan plan üzrə bütün təlim-məşq toplanışlarında, beynəlxalq turnirlərdə və rəsmi yarışlarda heç bir məhdudiyyət qoyulmadan iştirak ediblər. Milli komandamız elə AÇ-yə də iyulun 24-dən Pekində keçirilən məşqlərdən sonra -avqustun 12-də yola düşüb. Bir sözlə, 2 gündən sonra başlayacaq yarışda qarşıya qoyulan vəzifənin yerinə yetirilməsi üçün bütün imkanlardan istifadə olunub.