Azərbaycan yığması AÇ-də tarix yazdı
1 avqust 2011 14:52
Azərbaycanın kişi otüstü hokkeyçilərdən ibarət milli komandası İtaliyanın Kataniya şəhərində keçirilən Avropa çempionatında baş mükafata sahib olub. Azerisport.az xəbər verir ki, "A" qrupunda yer alan yığmamız Xorvatiya hokkeyçilərinə 6:2 hesabı ilə qalib gəlib və sonra İtaliya komandası ilə matçı 2:2 hesabı ilə başa vurub 4 xalla qrupda 1-ci yeri tutdu.
Hər 2 rəqibi ilə heç-heçə oynayan yarış sahibləri- italiyalılar isə 2 xalla qrup ikincisi kimi yarımfinala vəsiqə qazandılar. Reqlamentə görə həmin mərhələdə "A" və "B" qrupunda I və II yerlərə layiq görülənlər "çarpaz" üsulla bir-biri ilə qarşılaşıblar. Azərbaycan millisinin rəqibi Cəbəllütariq hokkeyçiləri olub. Həmyerlilərimiz həmin görüşdə 4:2 hesabı ilə qalib gələrək minimum vəzifə - növbəti mövsümdən qitənin II diviziononda oynamaq hüququnu özlərinə təmin ediblər. Digər yarımfinal cütündə isə italiyalılar İsveçrə hokkeyçilərindən güclü olduqlarını 3:2 hesablı qələbədə əks etdiriblər. Nəhayət iyulun 30-da elə bir prinsipial xarakter daşımayan final oyununda Azərbaycan və İtaliya yığmaları qarşı-qarşıya gəliblər. Maqraqlıdı ki, 2005-ci ildə Bakıda qadın otüstü hokkeyçilər arasında keçirilən Avropa çempionatında da bu ölkələrin milli komandaları II diviziondan "elita"ya vəsiqə qazanmışdılar. O zaman bu rəqiblərin final görüşündə meydan sahibləri - Azərbaycan hokkeyçiləri minimal hesabla qalib gəlmişdilər. Ancaq bu dəfə ssenari təkrarlanmadı. Kişi hokkeyçilərin final qarşılaşmasında meydan sahibləri yox, Azərbaycan hokkeyçiləri qələbə qazandılar. Final görüşünün əsas vaxtı ilkin qrup mərhələsimdə olduğu kimi 2:2 hesabı ilə heç-heçə başa çatdığından qalibi aşkar etmək üçün əlavə vaxtdan (7,5 x 7,5 ) istifadə olunub. Həmyerlilərimiz əlavə vaxtın 5-ci dəqiqəsində standart cərimə zərbəsindən "qızıl qol" vuraraq 3:2 hesablı qələbə ilə Avropa çempionatının baş mükafatına sahib olublar.
Qeyd edək ki, bu qələbə Azərbaycan hokkeyində yeni bir şanlı səhifənin yazılması deməkdi. Neçə illər idi ki, kişi hokkeyçilərimiz Avropa çempionatında III diviziondan yuxarı qalxa bilmirdi. Bu dəfə milli komandamız nəhayət ki, irəliyə doğru bir addım atıb. Bu gün qalib komandanın Heydər Əliyev Beynəlxalq hava limanında qarşılanma mərasimi olacaq. Yığmamız Bakı vaxtıyla saat 17:35 dəqiqədə Milan - Bakı təyyərə reysi ilə vətənə qayıdacaq.