Azad Rəhimov: Bu məsələyə idman ictimaiyyəti ilə birgə baxacağıq
20 iyun 2012 14:54
Gənclər və idman naziri Azad Rəhimov 2012-ci il London Yay Olimpiya Oyunlarında Azərbaycan Milli komandasının bayraqdarı funksiyasını yerinə yetirməyə namizədi açıqlayıb. Azerisport.az xəbər verir ki, Azad Rəhimov bu şərəfli vəzifəyə yunan-roma güləşi üzrə olimpiya və ikiqat dünya çempionu Fərid Mansurovu təklif edib.
Azad Rəhimov deyib ki, bayraqdarın Fərid Mansurovun olmasını istəyərdi: “Çünki Fərid Mansurov ən titulu idmançımızdır. 2008-ci il Pekin Olimpiadasında da bayraqdar o idi və nailiyyətlərimiz də yüksək oldu. Yenə də onu təklif edərdim. Amma bu məsələyə idman ictimaiyyəti ilə birgə baxacağıq”.
Qeyd edək ki, Azərbaycan yığması 2008-ci il Pekin Yay Olimpiya Oyunlarında 1 qızıl, 2 gümüş və 4 bürünc medal qazanıb. Artıq idmançı karyerasını bitirən Fərid Mansurov həmin olimpiadada da bayraqdar olsa da, mükafatçılar sırasına düşə bilməyib. Səbəb kimi onun açılış mərasimi vaxtı soyuqlaması göstərilib. Fərid Mansurov sonradan təklif edib ki, London Olimpiadasında bayraqdar funksiyasını iştirakçı idmançılardan yox, veteran idmançılardan biri yerinə yetirsin.