BP şirkəti paraolimpiya hərəkatına dəstək verir
2 dekabr 2013 14:55
Noyabrın 29-da Azərbaycan Respublikası Milli Paraolimpiya Komitəsi (MPK) rəsmi tərəfdaşı BP şirkəti ilə birgə Kürdəmir Paraolimpiya İdman Kompleksində Paraolimpiya İdman Festivalı keçirib. Azerisport.az xəbər verir ki, tədbirin əsas məqsədi əlil idmanı və Paraolimpiya dəyərlərini geniş əhali kütləsi arasında təşviq etməklə insanları, xüsusilə uşaqları, gəncləri Paraolimpiya hərəkatının fəal üzvlərinə çevirməkdir.
Nümunəvi idman və musiqili-bədii proqramdan ibarət festivalda Kürdəmir şəhərindən əsasən uşaq və gənclər iştirak etmişdir. Festivalda uşaq və gənclərə dəstək üçün Paraolimpiya çempionu Oluxan Musayev və digər gənc paraolimpiyaçılar da iştirak etmişlər.
MPK-ın vitse-prezidenti Şaiq Həmidov çıxış edərək iştirakçılara Paraolimpiya hərəkatının tarixçəsi və London 2012 Oyunlarından başlayan MPK-BP rəsmi tərəfdaşlığından danışdı. O, festivalın 3 dekabr - Beynəlxalq Əlillər Gününə həsr edildiyini vurğulayaraq insanları, xüsusilə uşaqları və gəncləri sağlamlıq imkanlarından asılı olmayaraq idmanla məşğul olmağa çağırdı. Şaiq Həmidov tədbirin təşkilində göstərdikləri dəstəyə və köməyə görə BP şirkətinə, rayon icra hakimiyyətinə, gənclər və idman idarəsinə, həmçinin Kürdəmir Olimpiya İdman Kompleksinin rəhbərliyinə komitə adından təşəkkürünü bildirdi. Sonra Rayon İcra hakimiyyətinin və rayonun Gənclər və idman idarəsinin nümayəndələri çıxış edərək rayonda əhalinin idmana və bədən tərbiyəsinə cəlb olunması üçün yaradılmış şəraitdən danışdılar.
Rəsmi çıxışlardan sonra gənc idmançılar müxtəlif idman növləri üzrə nümunəvi çıxışlar etmişlər. Təbdirdə yerli incəsənət ustaları da müxtəlif musiqi nömrələri ilə çıxış ediblər.
Tədbirin sonunda Şaiq Həmidov MPK adından yerli hökumət qurumlarını və Olimpiya İdman Kompleksini fəxri diplom və hədiyyələrlə təltif etdi.
