Hərçəqani və Abakarova da qızıl medal və lisenziya qazandı
Türkiyənin İstanbul şəhərində Rio-2016 Olimpiya Oyunlarına Lisenziya xarakterli Avropa təsnifat turniri keçirilib. Azerisport.az xəbər verir ki, sözügedən yarışın son günü də komandamız üçün uğurlu alınıb.
Belə ki, yığma komandamızın üzvü Milad Beigi Hərçəqanı latviyalı Yanus Kauneni (16:0), erməni idmançısı Arman Yeremyanı (11:1) və yarımfinalda türkiyəli Yunus Sarını (10:1) böyük hesablarla məğlub edərək finala yüksəlib. İdmançımız finalda polşalı rəqibi Pyotr Pazinskiyə 14:2 hesabı ilə qalib gələrək turnirin qızıl medalını əldə edib.
Qadın taekvondoçumuz Patimat Abakarova isə Dünya Taekvondo Federasiyasını təmsil edən Dino Poriunes-Lanqerudidən (4:1), yunanıstanlı idmançı İoanna Kotsudan (5:1), yarımfinalda isə ukraynalı İrina Romaldanovadan (3:1) üstün olaraq finala adlayıb. P. Abakarova finalda serbiyalı idmançı Tiyana Boqdanoviçi (6:5) mübarizədən kənarlaşdıraraq yarışın qalibi olub.
Beləliklə, Braziliyada keçiriləcək Yay Olimpiya Oyunlarına taekvondo üzrə lisenziya qazanan idmançılarımızın sayı 4-ə çatıb. Xatırladaq ki, Fəridə Əzizova ölkəmizə taekvondo üzrə 2-ci lisenziyanı turnirin ilk günündə qazandırmışdı. Bundan əlavə, digər lisenziyanın sahibi Radik İsayev isə 2015-ci ilin dekabrında 80+kq çəki dərəcəsində Olimpiadaya iştirak hüququnu təmin etmişdi.