Azərbaycan millisindən 26 medal
12 iyul 2011 16:21
Ümummilli lider Heydər Əliyevin xatirəsinə həsr olunmuş güləş üzrə “Qızıl Qran Pri” beynəlxalq turnirinin final mərhələsi başa çatıb. Azerisport.az xəbər verir ki, hər üç növ üzrə mübarizə aparan yığma komandalarımız turniri ümumilikdə 26 medalla başa vurub, onlardan 9-u qızıl, 6 gümüş və 11 bürünc olub.
Turnirin ilk günündə sərbəst güləşçilər mübarizə aparıblar. Yığmamız ümumilikdə 5 qızıl, 2 gümüş və 3 bürünc qazanmaqla komanda hesabında birinci yeri tutub. Qızıl medalları Mahmud Məhəmmədov (55 kq), Zəlimxan Hüseynov (60 kq), Cəbrayıl Həsənov (66 kq), Şərif Şərifov (84 kq) və Xetaq Qazyumov (96 kq) qazanıb. Gümüş medallar Ağahüseyn Mustafayev (60 kq) və Əşrəf Əliyevin (74 kq), bürünc medallar isə Toğrul Əsgərov (60 kq), Aleksandr Qostiyev (74 kq) və Cəmaləddin Məhəmmədovun (120 kq) adına yazılıb.
Turnirin ikinci günündə mübarizə aparan qadın güləşçilərimiz 2 qızıl, 1 gümüş və 4 bürünc medal və 70 xal qazanmaqla yalnız Rusiyadan (85 xal) geri qalaraq komanda hesabında ikinci olub. Üçüncü yeri isə 45 xalla Yaponiya komandası tutub. Mariya Stadnik (48 kq) və Sona Əhmədli (59 kq) qızıl medala sahib olublar. Gözəl Zutova (63 kq) yalnız finalda məğlub olub və gümüş medal qazanıb. Bürünc medalları isə, müvafiq olaraq, Yuliya Ratkeviç (55 kq), Olesya Zamula (59 kq), Zümrüd Qurbanhacıyeva və Nataliya Palamarçuk (hər ikisi 67 kq) qazanıblar.
Ümummilli lider Heydər Əliyevin xatirəsinə həsr olunmuş güləş üzrə “Qızıl Qran Pri” beynəlxalq turnirinin final mərhələsinin son günündə yunan-Roma güləşçiləri mübarizə aparıblar. Yığma komandamızın üzvləri 2 qızıl, 3 gümüş və 4 bürünc medal qazanıb. Rövşən Bayramov (55 kq) və Həsən Əliyev (60 kq) qızıl, Taleh Məmmədov (55 kq), Elvin Mürsəliyev (74 kq) və Saman Təhmasibi (84 kq) gümüş medala sahib olub. Bürünc medalları isə yığmamıza Eldəniz Əzizli, Orxan Əhmədov (hər ikisi 55 kq), Kamran Məmmədov (60 kq) və Vitali Rəhimov (66 kq) qazandırıb.
