Rauf Məmmədov: Şəmkirdə bütün rəqiblər mənim üçün güclüdür
Mərhum şahmatçımız Vüqar Həşimovun xatirəsinə həsr olunan ShamkirChess2015 turnirində ilk turda Fransa şahmatçısı Maksim Vaşye-Laqravla heç-heçə oynayan azərbaycanlı qrossmeyster Rauf Məmmədov partiya haqda fikirlərini bildirib. Azerisport.az xəbər verir ki, o, bunları söyləyib:
"Şəmkirdə təşkilatçılıq yüksək səviyyədədir. Ümumiyyətlə yaxşı ki, Şəmkirdə oynayırıq. Burada hər cür şərait var. Fevralda mənə bu turnirdə oynayacağımı dedilər. Bir həftə hazırlaşmışam. Hazırlıq millimizin kapitanı Aleksandr Xalifmanın rəhbərliyi altında olub. Düzünü desəm mənim üçün Şəmkirdə bütün rəqiblər güclüdür. Burada zəif rəqib yoxdur. İlk oyuna gəlincə sonradan ciddi təhlil edəcəm. Çalışdım sakit oynayıb. Səbrlə və təmkinlə mübarizə aparmaq istəyirəm. Qarşıda bizi 8 tur gözləyir. Tələsmək səhvə səbəb ola bilər. Heç-heçə ədalətli nəticədir".
Rauf Məmmədov rusiyalı dünya çempionu Vladimir Kramnikin Şəmkirdə olan şahmatçılar arasında gələcəyin iki dünya çempionunun olduğunu deməsinə münasibət bildirib: "Kramnik kimləri nəzərdə tutub? Bilirsiniz fikrimcə Maqnus Karlsen hələ uzun müddət şahmat tacını özündə saxlayacaq. 30 ildən sonra kimsə onu uda bilər. Hazırda Karlsen bir nömrədir".
Fransız Maksim Vaşye-Laqrav Şəmkirdəki ilk partiya haqda bunları deyib: "Həyəcan yox idi. Sakit oyun oldu. Bərabərlik normal nəticədir. Sadəcə qarşıda bizi daha güclü rəqiblərin gözlədiyini düşünürəm. Kramnik, Anand və Karlsenlə oyunlar var. Həvəsdən düşmək olmaz. Şəmkir hər bir şahmatçı üçün ciddi çağırışdır".
