Azərbaycanın Şahmat Olimpiadası üçün heyəti açıqlandı
Azərbaycanın kişi və qadın şahmatçılardan ibarət yığması iyulun 29-da Norveçin Tromse şəhərinə yola düşür. Azerisport.az xəbər verir ki, şahmatçılarımız Tromsedə keçiriləcək növbəti şahmat olimpiadasında iştirak edəcək.
Kişi şahmatçılardan ibarət yığmada Şəhriyar Məmmədyarov, Teymur Rəcəbov, Eltac Səfərli, Qədir Hüseynov və Rauf Məmmədov təmsil olunacaq. Komandanın kapitanı Aleksandr Xalifman olacaq. Fikrət Sideyifzadənin kapitanı olduğu qadınlardan ibarət yığmada Zeynəb və Türkan Məmmədyarovalar, Gülnar Məmmədova, Xəyalə Abdulla və Səbinə İbrahimova çıxış edəcək. Azərbaycan olimpiadada 10 hakimlə təmsil olunacaq.
Qeyd edək ki, avqustun 12-də Tromsedə Azərbaycan günü keçiriləcək. Mərasimdə olimpiadanın bayrağı 2016-cı ildə yarışa ev sahibliyi edəcək Bakı şəhərinin rəsmilərinə təqdim olunacaq. Tədbirdə Gənclər və İdman nazirliyi, eləcə də Azərbaycan Şahmat Federasiyasının rəsmilərinin iştirakı gözlənilir.
