Baku Fires - Astana Arlans görüşü öncəsi baş məşqçilər danışdı
Ümumdünya Boks Seriyasında (WSB) mübarizə aparan “Baku Fires” klubu fevralın 4-də növbəti görüşünə çıxacaq. Azerisport.az xəbər verir ki, komandamızın rəqibi liqanın iddialı klublarından olan “Astana Arlans” olacaq.
Bu gün hər iki komandanın baş məşqçilərinin və boksçularının iştirakı ilə çəki mərasimi və mətbuat konfransı keçirilib.
Qonaqların baş məşqçisi Nurlan Akurpekov Özbəkistanda uduzmalarına baxmayaraq, Bakıya iddialı gəldiklərini deyib: ”Bundan əvvəlki turda səfərdə “Uzbek Tigers”ə 1:4 hesabı ilə uduzduq. Özbəkistanda son illərdə boks yetərincə inkişaf edib. Bizdə isə əsas heyətin bir çox üzvləri Olimpiya oyunlarına hazırlaşırlar. Amma Bakıya gələn boksçularımız da yetərincə təcrübəlidirlər. Çalışacağıq ki, burdan uğurlu nəticə ilə ayrılaq. “Astana Arlans” iki dəfə liqanın qalibi olub. Bu möbsüm də iddialıyıq”.
“Baku Fires”in baş məşqçisi Nuripaşa Talibov Qazaxıstan klubunun WSB-də ən güclülərdən olduğunu vurğulayıb: “Astana Arlans” artıq bir neçə ildir ki, bizim əsas rəqiblərimizdəndir. “Baku Fires”in heyətində də təcrübəli boksçular var. Komandamıza inanıram. Boks həvəskarlarını arenaya dəvət edirik, onların dəstəyinə də böyük ehtiyacımız olacaq”. Talibov martda Bakıda keçiriləcək “Böyük İpək Yolu” yarışı ilə də bağlı fikirlərini bildirib: “İstəyirdik ki, bu turnirdə bir neçə boksçumuz gücünü sınasın. Ancaq federasiyadan dedilər ki, Azərbaycanı yalnız bir heyət təmsil edəcək. Niyə belə olduğunu bilmirəm. Bu suala millinin məşqçiləri daha yaxşı cavab verə bilərlər".
69 kq çəki dərəcəsində rinqə çıxacaq Tamerlan Abdullayev də sabahkı döyüşlə bağlı fikirlərini bildirib: “Təlim-məşq toplanışlarının hər birində iştirak etmişəm. Hazırda yaxşı formadayam. AİBA Pro Boxing turnirində 6 raund döyüşürdüm. İndi 5 raund mübarizə aparacam. İnanıram ki, sabah qalib gələ biləcəyəm”.
Xastırladaq ki, “Baku Fires" – “Astana Arlans” görüşü martın 4-də, saat 19:00-da Boks Mərkəzində start götürəcək.
Komandaların heyətləri:
52 kq. Məhəmməd İbiyev – Oljas Sattibayev
60 kq. Nəsrəddin Məmmədov – Zakir Safiullin
69 kq. Tamerlan Abdullayev – Aslanbek Şımberqenov
81 kq. Mixail Dolqolivets – Nurdaulet Jarmanov
+91 kq. Arslanbek Mahmudov – Nurlan Bekzatov
