Argentina və Fransa qrup mərhələsini lider kimi başa vurdu
DÇ-2014-də qrup mərhələsinin 3-cü turunun oyunları davam edir. Azerisport.az xəbər verir ki, bu gün daha 4 qarşılaşma baş tutub.
Öncə F qrupunda iki oyun keçirilib. Bosniya və Hersoqovina İranla, Argentina isə Nigeriya ilə qarşılaşıb. Argentina 1/8 finala vəsiqəni ikinci turda təmin etmişdisə, Bosniya və Hersoqovina pley-off şanslarını itirmişdi. Odu ki, əsas mübarizə İran və Nigeriya arasında gedirdi. İran millisi qələbə sayəsində 1/8 finala çıxa bilərdi. Təbii ki, Argentina da Nigeriyaya qalib gəlsəydi. Nigeriyanın qələbəsi isə digər oyunun nəticəsini gözləmədən onları növbəti mərhələyə çıxaracaqdı. Amma Argentina və Bosniya yığmalarının qələbələri bu qrupda ciddi dəyişikliyə səbəb olmayıb və ilk iki pillənin sahibi olduğu kimi qalıb: argentinalılar birinci, nigeriyalılar ikinci yerlə pley-offa çıxıblar.
Gecə saatlarında isə E qrupunun son iki oyunu keçirilib. Ekvador Fransa, Honduras isə İsveçrə ilə üz-üzə gəlib. Fransa millisi 1/8 finalı məntiqi olaraq lider kimi təmin etmişdi. Bu qrupda son vəsiqə uğrunda əsas mübarizə Ekvador və İsveçrə yığmaları arasında idi. Honduras isə yalnız möcüzə sayəsində 1/8 finala çıxa bilərdi. Honduras son oyunda da darmadağınla üzləşib və bu şansından yararlana bilməyib. Nəticədə, Fransa və İsveçrə pley-offa vəsiqə qazanıb.
DÇ-2014
Qrup mərhələsi
25 iyun
F qrupu
Bosniya və Herseqovina - İran - 3:1
Qollar: E.Dzeko, 23, M.Pyaniç, 59, A.Vrsayeviç, 83 - Q.Reza, 82.
Nigeriya - Argentina - 2:3
Qollar: A.Musa, 4; 47 - L.Messi, 3; 45, M.Roxo, 50.
F qrupundakı son durum: Argentina - 9, Nigeriya - 4, Bosniya və Herseqovina - 3, İran - 1.
E qrupu
Ekvador - Fransa - 0:0
Honduras - İsveçrə - 0:3
Qollar: X.Şaqiri, 6; 31; 71.
E qrupundakı son durum: Fransa - 7, İsveçrə - 6, Ekvador - 4, Honduras - 0.