İtaliya da DÇ ilə vidalaşdı
DÇ-2014-də üçüncü tur həyəcanı davam edir. Azerisport.az xəbər verir ki, bu axşam daha iki qrupda qrup mərhələsinin son oyunları keçirilib.
D qrupunda Kosta Rika 1/8 finala vəsiqəni təmin etdiyindən Amerika təmsilçisi ilə İngiltərə arasındakı oyun formal xaraker daşıyırdı. Çünki mübarizədən kənarlaşan İngiltərə qələbə qazansa belə, heç nə dəyişməyəcəkdi. Görünür, elə intriqanın olmaması səbəbindən bu görüşdə qapılara qol vurulmayıb. Əsl ölüm-dirim mübarizəsi İtaliya - Uruqvay görüşündə yaşanıb. Sabiq dünya çempionlarının hər ikisinin aktivində 3 xal vardı. İtaliya qələbə və ya heç-heçə sayəsində 1/8 finala çıxacaqdısa, Uruqvayı ancaq qalibiyyət qane edirdi. Gərgin keçən matçın son dəqiqələrində vurulan qol məhz uruqvaylıları pley-offa daşıyıb. İtaliya isə İspaniya və İngiltərə kimi nəhənglərin ardından DÇ-ni tərk edən növbəti Avropa təmsilçisi olub.
C qrupunda Yaponiya pley-offu sığortalamış Kolumbiya ilə münasibətlərə aydınlıq gətirib. Kolumbiyalılar son oyunda da qalib gələrək, yüzfaizlik nəticəyə imza atıblar. Yunanıstan isə Kot d`İvuarla qarşılaşıb. 1/8 finala ikinci vəsiqəni əldə etmək üçün həm Yaponiya, həm Yunanıstan, həm də Kot d`İvuarın şansı olsa da, Afrika təmsilçisi digərlərinə nisbətən pley-offa daha yaxın idi. Lakin yunanlar qələbə qazanaraq, afrikalıları qabaqlayıb və pley-offa çıxıblar.
DÇ-2014
Qrup mərhələsi
24 iyun
D qrupu
Kosta Rika - İngiltərə - 0:0
İtaliya - Uruqvay - 0:1
Qol: Qodin, 81.
D qrupundakı son durum: Kosta Rika - 7, Uruqvay - 6, İtaliya - 3, İngiltərə - 1.
C qrupu
Yunanıstan - Kot d`İvuar - 2:1
Qollar: Samaris, 42, Samaras, 90-pen - Boni, 74.
Yaponiya - Kolumbiya - 1:4
Qollar: Okazaki, 45 - Kuadrado, 17, Martines, 55; 82, Rodriqes, 90.
C qrupundakı son durum: Kolumbiya - 9, Yunanıstan - 4, Kot d`İvuar - 3, Yaponiya - 1.
