Tale Heydərov: Hədəfimiz Bakıda Ronaldinyonun adına akademiya yaratmaqdır
"Qəbələ"nin prezidenti məşhur braziliyalı futbolçu Ronaldinyonun Bakıya səfərindən və onunla birgə planlaşdırdıqları yeni layihədən söhbət açıb. Azerisport.az xəbər verir ki, o, bunları söyləyib:
"Ronaldinyonu Azərbaycana dəvət etməyi çoxdan planlaşdırmışdıq. Amma Ronaldinyo məhz indi vaxt tapa bildi və ölkəmizə səfər etdi. Hədəfimiz Bakıda onun futbol akademiyasını yaratmaqdır. Qəbələdə öz akademiyamız var. Amma Bakıda ayrı akademiya yaratmaq istəyirik. Akademiya Ronaldinyonun adını daşıyacaq. Bu, yeniyetmə futbolçularımız üçün bir stimul olmalıdır. Ronaldinyo özü də bu akademiyanın fəlsəfəsinin yaradılmasında yaxından iştirak edəcək. Hələ akademiyanın harada yerləşəcəyi bəlli deyil. Tezliklə bu məsələyə də aydınlıq gələcək. AFFA-ya təşəkkürümüzü bildiririk ki, bu məsələdə bizə yardımçı olmağa söz veriblər.
Ronaldinyo mənim sevimli oyunçumdur. Özünə də bu haqda danışmışam. Onun bu səfəri planlaşdırılmamışdı. Amma özü bunda maraqlı oldu. Şadam ki, bütün danışıqlar müsbət yekunlaşdı. Biz ondan Azərbaycana belə maraq gözləyirdik. Ronaldinyonun adına akademiya yaratmaq böyük hadisədir. Onun "Qəbələ"də oynamasına gəlincə, bu barədə sualı özünə verməyiniz daha yaxşı olardı. Əlbəttə, belə bir futbolçu azarkeşləri tribunalara toplamağa çox yardımçı olardı".