Ziya Əzizov: Azərbaycanın əsas yığmasında oynaya bilərəm
Futbol üzrə Azərbaycan U-19 yığmasının və Hollandiyanın "Den Boş" klubunun yarımmüdafiəçisi Ziya Əzizovun azerisport.az saytına müsahibəsi
- Hollandiyada işlərin necə gedir?
- Hər şey normaldır. Məşq edirəm, oynayıram.
- PSV-yə keçəcəyin deyilirdi. Alınmadı?
- Hələ bu barədə danışmaq istəmirəm. Hər şey qısa zamanda bəlli olacaq. Bu barədə hər belə xəbər mənim çıxışıma təsir edə bilər. Nə vaxt dəqiq məlumat olsa, o zaman danışarıq.
- Neçə ildir "Den Boş"dasan?
- 1998-ci ildə Moskvada anadan olmuşam. 5 yaşımdan futbol oynamağa başlamışam. Sonra "De Yonq"un futbol akademiyasına keçdim. Bir müddət sonra "Den Boş"a keçdim. Bu komandanın məşqçiləri mənim oyunumu görmüşdü və baxışa çağırmadan birbaşa müqavilə təklif etdilər. Artıq yeddi ildir buradayam.
- Orada sənə çətin deyil?
- Rəqabət aparmaq və digər futbolçulardan seçilmək lazımdır. Oynayacaq səviyyədə deyilsənsə, baş məşqçi səni əsas heyətdə meydana buraxmayacaq.
- Yığmamızın Sloveniyadakı toplanışına niyə gecikdin?
- Klub məni gec buraxdı. Buna baxmayaraq, Xorvatiya ilə hər iki oyunda (2:2, 1:1) iştirak edə bildim.
- Azərbaycanın əsas yığmasına dəvət almağı düşünürsən?
- Azərbaycanın əsas yığmasında oynamağı çox arzulayıram. Avropada 17 yaşında əsas millidə oynayan futbolçular az deyil. Amma bizdə münasibət bir fərqlidir. Tez olduğunu deyirlər.
- Deməli, buna tam hazır olmaq lazımdır...
- Mən millidə oynamağa hazıram. Hollandiyada özümdən yaşlılara qarşı oynayıram. Məncə, əsas millidə oynamaq öz həmyaşıdlarına qarşı mübarizə aparmaqdan asandır.
- Millimizin baş məşqçisi Robert Prosineçki deyib ki, sənin oyunundan xəbərsizdir...
- Ola bilsin ki, məni görməyib. Amma mən yığmaya kömək edəcək vəziyyətdəyəm. Dəvət gözləyirəm.
- Azərbaycan klublarından təklif yoxdur?
- Təklif olub. Amma mən Avropada oynamaq istəyirəm.
- Ola bilər ki, səni Hollandiya yığmasına dəvət etsinlər?
- Əvvəllər məni gənclərdən ibarət komandaya dəvət etmişdilər. Amma indi Hollandiya yığmasında çıxış etmək üçün bu ölkənin əsas çempionatında oynamaq lazımdır.