Ağabala Ramazanov: Zirə ilə oyunda heç nədən qol buraxdıq
"İnter"in hücumçusu Ağabala Ramazanov Topaz Premyer Liqasının 7-ci turu çərçivəsində "Zirə"yə qarşı keçirdikləri oyundan (1:1) sonra azerisport.az saytının suallarını cavablandırıb:
- Matçla bağlı fikirləriniz?
- Matça yaxşı başlamışdıq. Təəssüf ki, qələbəni son dəqiqələrdə əldən verdik. Artıq növbəti oyunumuzu düşünməliyik.
- Xal itkisini gözləmirdiniz?
- Futbolda hər şey olur. Biz də son dəqiqələrdə vurduğumuz qollar az xal və xallar qazanmamışıq.
- Bəlkə komandada arxayınlıq yaranmışdı?
- Xeyr, biz sonadək mübarizə aprdıq. Sadəcə, heç nədən qol buraxdıq.
- Viktor İqbekoyinin qolu gözəl alındı. Sanki, "İnter"in bütün oyunçuları dayanıb onun zərbəsini gözləyirdi...
- Komandamız son dəqiqələrdə müdafiə olundu. Qolu da öz səhvimizdən buraxdıq. Bu səhvlər üzərində çalışmalı və növbəti oyunlarda təkrarlamamalıyıq.
- "Zirə" ilə oyunda cari mövsümdəki üçüncü qolunuzu vurdunuz. Bombardirlər yarışında mübarizə aparmaq fikriniz var?
- Bəxtim gətirsə, bəli. Vurduğum bütün qollar komandamın uğurlu çıxışının nəticəsidir. Buna görə komanda yoldaşlarıma minnətdaram.
- "Qarabağ" bu tur "Qəbələ"yə qalib gəlsə, "İnter" ikinci pillədəki mövqeyini itirəcək...
- Hər iki komandaya uğurlar arzulayıram. Amma biz öz oyunumuz barədə düşünürük. Onlara Avropa Liqasında da uğur diləyirəm. Hər iki təmsilçimizin uğuru bizi sevindirir.
- Qarşıda Azərbaycan millisinin DÇ-2018-in seçmə mərhələsi çərçivəsində Norveç və Çexiya ilə oyunları var. Siz bu görüşlərdə nəyə ümid edirsiniz?
- Maksimum xal toplamağa çalışacağıq. Bu oyunlarda həm sizi, həm də özümüzü sevindirməliyik.
- Komanda yoldaşınız Rauf Əliyev də son dövrlər qollar vurur. Amma millinin baş məşqçisi Robert Prosineçki ona dəvət göndərmir. Sizcə, niyə?
- Yaxın günlərdə millinin heyəti açıqlanacaq. Ümid edirəm ki, Raufun da adı həmin siyahıda olacaq.