Roman Qriqorçuk: Qəbələ Avroliqada müdafiə futbolu oynamır
"Qəbələ"nin baş məşqçisi Roman Qriqorçuk Avropa Liqasının qrup mərhələsi çərçivəsində Almaniyanın "Maynts" klubuna qarşı keçirəcəkləri oyun öncəsi fikirlərini bölüşüb. Azerisport.az xəbər verir ki, ukraynalı mütəxəssis öncə bunları söyləyib:
"Maynts" çox ciddi komandadır. Düşünmürəm ki, onlar bizə qarşı əsas heyətlə oynamaqdan imtina edələr. Ötən mövsüm Dortmund "Borussiya"sı ilə oyunlar yadımdadır. Almanlar hər iki oyunda bizə qarşı optimal heyətlə mübarizə apardılar. "Maynts"ın futbolçuları çox güclüdürlər, sürətlidirlər. Onlar çox yaxşı əks-hücumlar edirlər".
Yenidən "Bakcell Arena"da oynayacaq "Qəbələ"nin çalışdırıcısı qazonla bağlı çox danışmaq istəməyib: "Hələ qazon haqda danışmaq çətindir. Çünki hər dəfə yağışdan sonra qazon ağır olur. Ola bilər ki, meydançanın vəziyyətinə görə, hücumda başqa variantları sınaqdan keçirək".
Qriqorçuk Avroliqadakı oyun üslublarından da danışıb: "Avroliqada müdafiə futbolu oynadığımızı düşünmürəm. Bizim oyun fəlsəfəmiz daha çox hücumla bağlıdır. Amma hər rəqib buna imkan vermir. Məsələn, "Anderlext" kimi".
Ukraynalı mütəxəssis müdafiəçi Rafael Santos, yarımmüdafiəçi Petar Franyiç barədə də söhbət açıb: "Rafael bizim üçün vacib oyunçudur. Franyiç də son dövrlər artırmaqdadır. O, artıq komandaya uyğunlaşıb".
"Qəbələ"nin çalışdırıcısı "Maynts"ın heyətində heç bir futbolçunu fərqləndirmək istəməyib: "Maynts"ın yüksək səviyyəli futbolçuları var. Amma kimisə xüsusi fərqləndirmək istəməzdim. Onlar taktiki cəhətdən çox effektlidirlər".
