Jayro: Hər şeyin yaxşı olacağına inanıram
"Neftçi"nin müdafiəçisi Jayro Premyer Liqanın 3-cü turu çərçivəsində "Qarabağ"a uduzduqları (0:3) oyundan sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Oyunla bağlı nə deyə bilərsiniz?
- Çox çətin oyun oldu. Amma belə olacağını bilirdik. "Qarabağ"ın gücünü qəbul etmək lazımdır. Bu oyun bir daha göstərdi ki, bundan da çox çalışmalıyıq. Çünki növbəti oyunlarda yaxşı çıxış etmək istəyirik.
- Razısınız ki, siz bu gün "Qarabağ"ın qələbəsinə xüsusi "töhfə" verdiniz?
- Bəli, elə alındı. Özünüz də gördünüz ki, uğursuz mövqedə idim. Elə alındı ki, top mənə toxunub qapıya getdi. Buna görə bütün komanda üzvlərindən və azarkeşlərimizdən üzr istəyirəm. Söz verirəm ki, qarşıdakı oyunlarda daha yaxşı çıxış edəcəyəm.
- Belə oyunla cari mövsümdə nəyə ümid edirsiniz?
- Biz çalışırıq. Buna görə əlimizi yanımıza salmamalıyıq. Daha çox çalışmalıyıq ki, uğur qazanaq.
- Çıxış yolunu nədə görürsünüz?
- Mən ancaq özüm haqda danışa bilərəm. Komandamızın baş məşqçisi var. Nəyi necə edəcəyimizi o söyləyəcək. Bizə ancaq çalışmaq qalır.
- Yeni transferlərdən də heç bir fayda yoxdur...
- Ayrıca hansısa futbolçu barədə danışmağım düzgün olmaz. Sadəcə, onu deyərdim ki, iki futbolçumuz cəmi bir həftədir bizimlədir. Həm də udanda da, uduzanda da buna komanda şəklində imza atırıq. Ola bilsin ki, hələ bütün futbolçular tam uyğunlaşmayıb. Amma hər şeyin yaxşı olacağına inanıram.