Əfran İsmayılov: Hədəf ÇL-in qrupunda oynamaqdır, Avroliqada yox
"Qarabağ"ın yarımmüdafiəçisi Əfran İsmayılovun azerisport.az saytına müsahibəsi
- Çexiya çempionu "Viktoriya"ya qarşı qolsuz səfər heç-heçəsini necə dəyərləndirərdiniz?
- Səfər oyunu çətin alındı. Güclü rəqibə qarşı oynayırdıq. "Viktoriya" azlıqda qalsa da, öz oyun üslubunu sonadək davam etdirməyə çalışdı. Biz isə maksimum diqqətli oynamağa çalışırdıq. Çoxdan idi belə güclü rəqibə qarşı oynamırdıq. Düzünü desəm, şəxsən mən "Viktoriya" ilə oyundan həzz aldım.
- 0:0 sizin üçün nə dərəcədə uğrlu nəticə sayıla bilər?
- İndi bu barədə danışmaq çətindir. Hər şeyə Bakıda aydınlıq gələcək. Əsas odur ki, səfərdə qol buraxmadıq.
- Rəqib futbolçuların "Qarabağ"ın heç nə ilə yadda qalmadığını bildiriblər...
- Hər kəsin öz fikri var. Onların da dediklərinə hörmətlə yanaşıram və bu barədə nəsə əlavə etmək istəmirəm.
- "Qarabağ" cavab oyununda necə futbol sərgiləməyi düşünür: hücum, ya müdafiə futbolu?
- Bunu baş məşqçi daha yaxşı bilir. O necə desə, elə də oynayacağıq.
- Mərhələ adlamaq şansınızı necə dəyərləndirirsiniz?
- Şanslar hələ bərabərdir. Bakıdakı oyun daha maraqlı və çətin olacaq. Evdə də qol buraxmaq olmaz. Bunun üçün diqqətli oynamalıyıq. Xoşbəxtliyi rəqib qapısı qarşısında axtarmaq lazımdır. Ümid edirəm ki, mərhələ keçəcəyik.
- Mütəxəssislər "Qarabağ"ın bu mövsüm sərgilədiyi oyunun zəif olmasını çempionatımızın səviyyəsinin aşağı düşməsi ilə əlaqələndirirlər. Razısınız?
- Düzdür, son mövsüm əvvəlkilərə nisbətən zəif oldu. Amma biz yenə də öz futbolumuzu sərgiləməyə çalışırıq.
- "Qarabağ"ın hücum xətti dişsiz görünür. Sizə elə gəlmir ki, komandaya hücumçu lazımdır?
- Bu sual baş məşqçiyə ünvanlanmalıdır. Mən bu işlərə qarışa bilmərəm. Bircə onu bilirəm ki, indi yaxşı futbolçu tapmaq çətindir. Birinin qiyməti bahadır, digərinin müqaviləsi var, bəziləri də Azərbaycana gəlməkdə maraqlı deyil.
- "Qarabağ" "Viktoriya" səddini keçə bilməsə, ÇL-in qrupuna düşmək yolunda önəmli şansı əldən verəcək...
- Bakıdakı oyunda uğurlu nəticə üçün mübarizə aparacağıq. Amma "Viktoriya"nı keçə bilməsək də, avrokuboklarda yolumuza davam edəcəyik. Çünki uğursuzluq halında Avropa Liqasının pley-offunda mübarizə aparmaq məcburiyyətində qalacağıq. Buna baxmayaraq, hədəfimiz ÇL-in qrupunda oynamaqdır.
- Sizcə, azarkeşlər cavab oyununda komandanıza daha böyük dəstək göstərəcək?
- Azarkeşləri bizə dəstək olmağa çağırıram. Ümid edirəm ki, tribunaları dolduracaqlar və bizə azarkeşlik edəcəklər. Bizim onların dəstəyinə ehtiyacımız var. ÜMid edirəm ki, biz də onları sevindirə biləcəyik.