Məhəmməd Mirzəbəyov: Lill səddini də keçə bilərik
"Qəbələ"nin müdafiəçisi Məhəmməd Mirzəbəyov Avropa Liqasının üçüncü təsnifat mərhələsi çərçivəsində Fransanın "Lill" klubuna qarşı keçirəcəkləri ilk oyun öncəsi azerisport.az saytının suallarını cavablandırıb:
- "Qəbələ" fransızlarla oyuna hazırdır?
- Bu oyuna ciddi hazırlaşmışıq. Fikrimcə, komanda tam hazırdır.
- Sizi Fransada hansı nəticə qane edəcək?
- Avroliqanın pley-offuna çıxmağımıza kömək edəcək istənilən nəticə.
- Səfərdə uğur qazanacağınıza inanırsınız?
- İstənilən kluba qarşı oynamaq, mərhələ keçmək olar. Biz də uğur qazanmaq üçün əlimizdən gələni edəcəyik.
- "Lill" üzərində qələbəni "Qəbələ"nin tarixində ən səs-küylü hadisə saymaq olar?
- Bizim üçün hər qələbə tarixidir. Ümid edirəm ki, qələbələrimizin sayını bu komanda ilə oyunlarda da artıra biləcəyik.
- Fransaya səfəriniz uzun çəkdi. Öncə Türkiyəyə, oradan Belçikaya, sonra da Lillə gəldiniz. Yorğunluq var?
- Əlbəttə, belə uzun yolçuluq həmişə komandaya təsirini göstərir.
- Rəqibin heyətində Eder kimi ulduz futbolçu var. Bu, sizi qorxutmur?
- Ederin bu komandada oynaması nəyisə dəyişmir. Bizim də Uiks, Dabo kimi futbolçularımız var. Ederin adı belə oyunlarda heç nəyi həll etmir. Ederi AÇ-yə kimi kim tanıyırdı ki? Heç kim. Sadəcə, AÇ-nin finalında Ronaldo, Kuarejma kimi futbolçular qol vura bilmədi, onda isə alındı. Bunun da sayəsində ulduza çevrildi. Bu üzdən də ondan çəkinməyə dəyməz. Biz meydana çıxıb, öz oyunumuzu sərgiləyəcəyik.