Andorra millisinin kapitanı: Azərbaycana yenə qol vurmağa çalışacağam
Andorra yığmasının kapitanı İldefons Lima bu gün Avstriyada Azərbaycan millisinə qarşı keçirəcəkləri yoxlama oyunu öncəsi azerisport.az saytının suallarını cavablandırıb.
- Komandanız millimizlə oyuna hazırdır?
- Əlbəttə. Bu oyuna Andorrada hazırlaşırdıq. Avstriyaya oyun günü gəldik.
- Sirr deyilsə, niyə?
- Pul yoxdur. Andorra kiçik ölkədir. Komandanızın Avstriyada olduğunu bilirəm. Azərbaycan yığmasında maliyyə baxımından vəziyyət yaxşıdır. Avstriyaya istədikləri vaxt gələ bilirlər.
- Azərbaycanla oyundan nə gözləyirsiniz?
- Maraqlı oyun olacaq. Azərbaycanın yaxşı komandası var. Futbol oynamağı bacarırlar. Orada necə uşaqların oynadığını bilirəm.
- Qələbəyə ümid edirsiniz?
- Bu oyunda daha çox gəncləri sınaqdan keçirəcəyik, yeni seçmə mərhələyə hazırlaşmağa çalışacağıq. Mən də heyətdəyəm. Amma baş məşqçinin məni meydana buraxıb-buraxmayacağını bilmirəm. Buraxsa, oynamağa hazıram.
- Rəqibinizi ortabab, ya güclü komanda sayırsınız?
- Güclü? Ortabab? Bizim üçün ortabab rəqib yoxdur. Andorra Avropanın ən kiçik ölkələrindən biridir. 30 min əhalisi var. Azərbaycanın əhalisi isə 9 milyondur. Amma biz Azərbaycan yığmasına qalib gəlməyə çalışacağıq.
- Millimizdə kimi tanıyırsınız?
- Rəşad Sadıqovu, Əfran İsmayılovu, Qara Qarayevi, Dmitri Nazarovu.
- Ölkəmizdə olmusunuz?
- Xeyr.
- Azərbaycan Andorraya uduzsa, bu, ölkəmizdə fiasko, faciə kimi qəbul ediləcək. Bəs siz uduzsanız, Andorrada buna necə baxacaqlar?
- Azərbaycanın Andorraya uduzması faciə deyil. Bu, futboldur. Faciə Suriyada baş verir.
- Sizin və ya komanda yoldaşlarınızdan kiminsə Azərbaycan çempionatında oynamaq şansı olub?
- Xeyr. Mən heç Azərbaycan çempionatında nələrin baş verdiyini bilmirəm.
- Azərbaycan və Andorra yığmaları indiyə qədər dörd dəfə üz-üzə gəliblər. Siz deyəsən, hər oyunda meydanda olmusunuz və hətta 2008-ci ildə millimizə qol da vurmusnuz...
- Həmin oyunları yaxşı xatırlayıram. Yeri gəlmişkən, qarşıdakı matç mənim yığmada 99-cu oyunum olacaq. 98 oyunda 10 qol vurmuşam. Yenə qol vurmağa çalışacağam. Qoldan əlavə, komandamızın qələbəsini də görmək istəyirəm.
