Ansi Aqolli: Ümid edirəm ki, hər şey istədiyimiz kimi olacaq
Albaniya yığmasının və "Qarabağ"ın müdafiəçisi Ansi Aqollinin azerisport.az saytına müsahibəsi
- "Qarabağ" "Neftçi" ilə kubokun final matçına hazırdır?
- Əlbəttə, oyuna tam hazırıq. Səbrsizliklə matçın startını gözləyirik.
- Yenə "qızıl dubl"a imza ata biləcəksiniz?
- Çalışacağıq. Meydana qələbə üçün çıxacağıq. Ümid edirəm ki, hər şey istədiyimiz kimi alınacaq. Amma bu uğuru təkrarlamaq elə də asan olmayacaq.
- "Neftçi"nin son dövrlərdə yaxşı oyun sərgiləməsi sizin üçün problem yaratmır?
- "Neftçi" yaxşı komandadır. Gənc və sürətli futbolçuları var. Amma biz də öz oyunumuzu göstərməyə çalışacağıq.
- Əksər futbolçular istirahətə yollanır, amma sizin belə imkanınız yoxdur...
- Qarşıda Fransada keçiriləcək Avropa çempionatı da var. Kubok oyunundan sonra millinin düşərgəsinə yollanmalıyam. Peşəkar futbolçularıq. Uğur qazanmaq istəyiriksə, öz işimizi görməliyik.
- Albaniya yığması AÇ-də debüt etməyə hazırdır?
- Hələ tam hazır olmağımızdan danışmaq tezdir. "Neftçi" ilə oyundan sonra Avstriyaya gedəcəyəm. Fransa səfərimizə də orada hazırlaşacağıq.
- İlk oyununuz İsveçrəyə qarşı olacaq. Qələbə qazana biləcəksiniz?
- AÇ-də çıxış etmək şansı qazanmışıqsa, uğur əldə etmək üçün əlimizdən gələni etməliyik. Öz oyunumuzla AÇ-də oynamağa layiq olduğumuzu göstərmək istəyirik. Qələbə qazanıb, xalqımızı, azarkeşlərimizi sevindirmək istəyirik. Qrupdan çıxmağımız isə lap əla olardı.
- Albaniya yığmasının seçmə mərhələdəki əsas liderlərindən biri olduğunuzu nəzərə alsaq, yəqin ki, AÇ-də də əsas heyətdə olacaqsınız...
- Əlbəttə, AÇ-də də oynamaq istəyirəm. Bunun üçün öz üzərimdə çox çalışıram. Son sözü isə baş məşqçi deyəcək.
- "Qarabağ"da çıxış etdiyinizi nəzərə alsaq, yəqin ki, Azərbaycanda da Albaniya yığmasına azarkeşlik edənlər çox olacaq...
- AÇ-də Albaniyaya azarkeşlik edəcəyini deyən azərbaycanlılarla tez-tez rastlaşıram. Onlar hətta bizim AÇ-yə vəsiqə qazanmağımıza da çox sevinirdilər. Azərbaycanlı fanatlara mənə dəstək olduqları üçün təşəkkürümü bildirirəm. Məhz onların sayəsində burada özümü evimdəki kimi hiss edirəm. Azərbaycanlı azarkeşlərin dəstəyi bizə kömək olacaq.
