Azərbaycan Kubokunda 1/2 final həyəcanı
Bu gün Azərbaycan kubokunda yarımfinal mərhələsinə start veriləcək. Azerisport.az xəbər verir ki, kubok uğrunda mübarizəni davam etdirən komandalar bu gün ilk 1/2 final oyunlarına çıxacaq.
Öncə “İnter”lə “Qarabağ” üz-üzə gələcək. Kubokda 3 dəfə yolları kəsişən komandalar 5 oyunda qüvvələrini sınayıblar. 1/8 və 1/4 finala təsadüf edən duellərdə iki oyunun yekununda “İnter” qalib gəlib. Yeganə final matçında isə “Qarabağ” üstün olub. 7 ildən sonra bu yarışda üz-üzə gələn komandalar ilk dəfə yarımfinalda münasibətlərini aydınlaşdıracaq. Əvvəlki oyunlara nəzər salsaq, “İnter” evdə quru hesablı qələbə qazanıb, “Qarabağ” isə öz meydanını qolsuz tərk etməyib. Əvvəlki 5 oyundan 2-də paytaxt, 2-də də Ağdam klubu qalib gəlib. Top fərqində isə bakılıların 5:4 hesablı üstünlüyü var.
Amma hazırda "İnter"in "Qarabağ" səddini keçməsi o qədər də inandırıcı görünmür. Əvvəla paytaxt təmsilçisi heyət və maliyyə imkanlarına görə ötən illərdəki qədər güclü deyil. Əvəzində Ağdam klubu ölkənin ən baxımlı və güclü komandası hesab olunur. Qurban Qurbanovun komandasının Topaz Premyer Liqasında ardıcıl üçüncü çempionluğunu bayram etməyə hazırlaşması da bundan xəbər verir. "İnter" isə hazırda üçüncü pillədə qərarlaşıb və hələ mövsümü neçənci yerdə başa vuracağı bilinmir. Üstəlik, "bankirlər" bu mövsüm ağdamlılara qarşı keçirdikləri çempionat oyunlarında da uğursuz olublar. "Qarabağ" üç dəfə bu rəqibinə qalib gəlibsə (2:0, 1:0, 2:0), cəmi bir oyunda heç-heçə qeydə alınıb (1:1). "İnter"in son məğlubiyyəti cəmi bir neçə gün öncə qeydə alınmışdı və həmin oyunda Zaur Svanadzenin komandası ciddi heç nə ilə yadda qala bilməmişdi. Bu üzdən də paytaxt təmsilçisinin "Qarabağ"a kubokda da ciddi müqavimət göstərəcəyini ehtimal edənlər azdır. "İnter"in əsas heyət oyunçularından bir neçəsinin zədəli olduğunu nəzərə alsaq, ağdamlıların kubokda da bu rəqibini mübarizədən kənarlaşdıracağını söyləmək olar.
Digər yarımfinal cütündə isə “Neftçi” ilə “Qəbələ” üz-üzə gələcək. İndiyədək kubokda yolları yalnız 1 dəfə kəsişən komandalar iki il əvvəl finalda qarşılaşıblar. Heç-heçə başa çatan matçın taleyini penaltilər seriyası həll edib. Daha dəqiq olan “Neftçi” kubokun sahibi olub. Bu dəfə də komandaların demək olar ki, eyni gücdə olduğunu söyləmək olar. Baxmayaraq ki, "Neftçi" ilə müqayisədə "Qəbələ"də vəziyyət daha ürəkaçandır. Amma bölgə təmsilçisi ilə müqayisədə bakılılara kubokun finalına çıxmaq daha çox lazımdır. Çünki "Qəbələ"nin avrokuboklara Premyer Liqa vasitəsilə vəsiqə qazanmaq şansı varsa, "Neftçi" kuboku qazanmaqla boşa verməkdə olduğu mövsümü xilas etməyə ümid bəsləyir. Bu üzdən də "ağ-qaralar" kubok matçlarında var gücünü qoyacaq. Lakin "Qəbələ" də kubokda uğur qazanmaqda iddialıdır və azarkeşlərin maraqlı və gərgin qarşılaşma izləyəcəyi şübhəsizdir.
Qeyd edək ki, cari mövsümdə Premyer Liqa çərçivəsində bu iki komanda arasında baş tutan oyunlarda heç-heçə qeydə alınmayıb. "Neftçi" hər iki ev oyununda "Qəbələ"yə məğlub olub - 1:2 və 0:1. Maraqlıdır ki, "Qəbələ" də öz meydanındakı görüşdən 0:1 hesablı məğlubiyyətlə ayrılıb.
Azərbaycan Kuboku
Yarımfinal (ilk oyunlar)
27 aprel (çərşənbə)
16:00. “İnter” - “Qarabağ”
Hakimlər: Rəhim Həsənov, Namiq Hüseynov, Vaqif Musayev, Mehman Mahmudov.
Əlavə köməkçi hakimlər: Ömər Paşayev, Ramil Diniyev.
AFFA nümayəndəsi: Maşallah Əhmədov.
Hakim-inspektor: Vüsal Əliyev.
Bakı. “İnter Arena”.
19:00. “Neftçi” - “Qəbələ”
Hakimlər: Əliyar Ağayev, Rza Məmmədov, Akif Əmirəli, Yaşar Abbasov.
Əlavə köməkçi hakimlər: Orxan Məmmədov, Ramil Əhmədov.
AFFA nümayəndəsi: Şaiq Həmidov.
Hakim-inspektor: Xaqani Məmmədov.
Bakı. “Bakcell Arena”.