Əfran İsmayılov: Neftçi ilə matçın ədalətli nəticəsi heç-heçə idi
"Qarabağ"ın yarımmüdafiəçisi Əfran İsmayılov Topaz Premyer Liqasının 14-cü turu çərçivəsində "Neftçi"yə qarşı oyundan sonra azerisport.az saytının suallarını cavablandırıb.
- Avroliqada İngiltərə "Tottenhem"inə məğlubiyyətdən sonra çempionatda "Neftçi"yə də uduzdunuz. Halbuki, əksəriyyət "Qarabağ"dan qələbə gözləyirdi...
- "Neftçi"ni qələbə münasibətilə təbrik edirəm. Onlar bu gün yaxşı futbol sərgilədilər. Buna baxmayaraq, bizim qol vəziyyətlərimiz rəqibdən daha çox idi. Əsas nəticədir ki, onu da "Neftçi" qazandı. Belə olur. Məğlubiyyətə görə özümüzə bəraət qazandırmaq, yorğun olduğumuzu demək istəməzdim. Heyət hər oyunda dəyişir, bu da bir qədər çətinlik yaşadır.
- Matçın nəticəsini ədalətli sayırsınız?
- Mənim fikrimcə, "Neftçi" ilə oyunun heç-heçə bitməsi daha ədalətli nəticə olardı. Amma yenə də "Neftçi"ni təbrik edirəm.
- Siz yorğunluğun məğlubiyyətinizdə rolunun olmadığını deyirsiniz. Amma Elvin Yunuszadə məhz yorğunluqdan şikayətlənib...
- Xeyr, yorğunluq məğlubiyyətimizə bəraət qazandıra bilməz. Həm də Elvin yorğunluqdan niyə şikayətlənir ki? Axı o, Avroliqada oynamır.
- Sizə elə gəlmir ki, "Tottenhem" və "Neftçi" ilə oyunlarda rəqibin cərimə meydançasına yaxınlaşandan sonra nə edəcəyinizi bilmirdiniz?
- "Neftçi" ilə oyundakı epizodların birində qapıya zərbə vurdum. Sadəcə, top qapı dirəyinə tuş gəldi. Bu, futboldur, alınmayanda alınmır.
- "Neftçi" ilə oyunadək əsas izləyicilərinizi 9 xal qabaqlayırdınız. Oyuna çıxarkən xal fərqini düşünürsünüz?
- Sizi əmin edirəm ki, mən heç xal fərqinin nə qədər olduğundan xəbərsiz idim. Əsas odur ki, liderik. Bu tempdə də davam etməliyik. "Qəbələ" də lider idi, indi isə onlar xal itirə-itirə gedir. Xal itkiləri hələ çox olacaq. Əsas bu məğlubiyyətdən dərs çıxarmağımızdır.