Ruslan Qurbanov: Millimiz yüksək yerlər uğrunda mübarizə apara bilər
Azərbaycan yığmasının və "Neftçi"nin hücumçusu Ruslan Qurbanovun azerisport.az saytına müsahibəsi
- Komandanızın Türkiyə toplanışını "Antalyaspor" üzərində qələbə ilə başa vurdunuz. Bu oyun barədə nə deyə bilərsiniz?
- Yaxşı oyun alındı. Biz bu oyunda ikiqat motivasiya ilə oynayırdıq. Çünki Bakıya yaxşı əhval-ruhiyyə ilə qayıtmaq istəyirdik. Qarşıdakı həftə Premyer Liqanın yeni mövsümü start götürür. "Antalyaspor" güclü rəqibdir. Amma biz xarakter nümayiş etdirib, qalib gəldik.
- Mövsümün açılış turunda "Kəpəz"lə qarşılaşacaqsınız...
- "Kəpəz"lə oyuna hazırıq. Çempionata qələbə ilə başlamaq vacibdir. Bu matçı səbrsizliklə gözləyirik. Gəncə klubuna gəlincə, onlar da yaxşı heyət formalaşdırıblar. Amma biz mövsümə qələbə ilə start verməyə çalışacağıq.
- DÇ-2018-in püşkatmasında yığmamız Almaniya, Çexiya, Şimali İrlandiya, Norveç və San Marino ilə düşdü. Püşkü necə qiymətləndirə bilərsiniz?
- Yaxşı qrupdur. Almaniya, Norveç və Şimali İrlandiya bizə tanış rəqibdir. Çünki bir müddət öncə bu komandalarla oynamışıq. Onların güclü və zəif cəhətlərini bilirik. Çexiya və San Marino ilə heç vaxt qarşılaşmamışıq. Şəxsən mən belə qrupa düşdüyümüz üçün şadam.
- Millinin şansları barədə nə deyə bilərsiniz?
- Fikrimcə, heç də pis deyil. Azarkeşlərimizi sevindirə bilərik.
- Yəni, qrupdan çıxa bilərsiniz?
- Almaniya və Çexiya qrupun favoritidir. Amma biz də yüksək yerlər uğrunda mübarizə apara bilərik. Əlbəttə, çox çətin olacaq. Hər halda məşqçilərimizin bütün tapşırıqlarına əməl etsək, nəticə qazana bilərik.
- Yığmamız nə qədər xal toplaya bilər?
- Bunu deməkdə çətinlik çəkirəm. Sadəcə, onu deyə bilərəm ki, hər oyuna qələbə üçün çıxacağıq. Əsas uduzmamaqdır. Nəyə nail olduğumuza isə sonda baxarıq. Hazırda isə biz DÇ-2018-in yox, AÇ-2016-nın seçmə mərhələ oyunlarını düşünməliyik. Qarşıda bizi Xorvatiya və Malta ilə oyunlar gözləyir. Azarkeşlərimizi bu oyunlarda sevindirmək istəyirik.