Əfran İsmayılov: Seltik ciddi rəqib olsa da, Qarabağ da çox şeyə qadirdir
Azərbaycan yığmsının və "Qarabağ"ın yarımmüdafiəçisi Əfran İsmayılovun azerisport.az saytına müsahibəsi
- Azərbaycan millisi DÇ-2018-in seçmə mərhələsində Almaniya, Şimali İrlandiya, Çex Respublikası, Norveç və San Marino ilə mübarizə aparacaq. Püşkü necə dəyərləndirərdiniz?
- Bəxtimiz gətirmədi. Çox çətin qrupa düşdük. Əlbəttə, uğur qazanmaq, yaxşı oyun sərgiləmək üçün əlimizdən gələni edəcəyik. Amma San Marinodan başqa bütün rəqiblərimiz çətindir. Eyni zamanda bizdən də sürpriz gözləmək olar. Elə bir müddət öncə AÇ-2016-nın seçmə mərhələsində də rəqibimiz olan Norveçdən səfərdə xal almışdıq.
- Millimiz bu qrupda nəyə ümid edə bilər?
- 3-4-cü yerlər uğrunda mübarizə apara bilərik.
- Qrupdan çıxmaq haqda heç düşünmürsünüz?
- Burada Almaniya və Çex Respublikası kimi rəqiblər var. Gəlin razılaşaq ki, belə bir qrupdan çıxmağımız real görünmür. Yeganə ümidverici məqam Robert Prosineçkinin gəlişindən sonra millimizdə irəliləyişin olmasıdır. Bu seçmə mərhələnin oyunlarına bir ildən çox vaxt var. Ola bilər ki, bu müddət ərzində millimiz daha da güclənsin və o zaman hədəflərimiz də dəyişsin. Amma indiki reallıqla nəyəsə ümid edə bilmərik.
- "Qarabağ"a qayıdışınız böyük rezonansa səbəb oldu...
- Doğma klubuma qayıtdım. Başqa komandaya da keçə bilərdim. Amma ağdamlıların təklifini böyük sevinclə qəbul etdim. Buradan gedəndə əksər adamlar incik ayrıldığımı deyirdilər. Lakin elə deyil. Bu klubda çalışanlarla, oynayan futbolçularla həmişə gözəl münasibətlərim olub. Onları özümə doğma hesab etmişəm. Mənə təklif göndərdilər, böyük məmnuniyyətlə qəbul etdim. "Qarabağ" böyük klubdur. Burada həmişə böyük rəqabət olub. Amma mən son dövrlər az məşq edirdim, oyun təcrübəm də azdır. Forma yığdıqdan sonra yenə bu komandaya fayda vermək üçün əlimdən gələni edəcəyəm.
- "Qarabağ" sizi Şotlandiyanın "Seltik" klubu ilə oyunlar üçün sifariş edəcək?
- Mənim adımı sifariş vərəqəsinə daxil edəcəklər. Amma Şotlandiyaya gedə bilməyəcəyəm. Viza ilə bağlı sənədləri vaxtında göndərə bilmədim. Ona görə ikinci oyunu gözləməli olacağam.
- Həmin oyuna qədər hazır ola biləcəksiniz?
- Olmaq istərdim. Meydana çıxıb-çıxmayacağıma isə Qurban Qurbanov qərar verəcək.
- Komandanızın şanslarını necə qiymətləndirirsiniz?
- "Qarabağ" son illərdə elə komandalara qalib gəlib ki, bu nəticələr artıq heç kimi təəccübləndirmir. Rəqib təbii ki, ciddi komandadır. Asan olmayacaq. Xüsusilə, səfərdəki görüş çox çətin keçəcək. Amma komandamızın da nəyə qadir olduğunu artıq çox adam yaxşı bilir.