Rauf Əliyev: Müdafiədəki səhvlər qələbə qazanmağımıza mane olur
"Neftçi"nin hücumçusu Rauf Əliyevin azerisport.az saytına müsahibəsi
- "Sumqayıt"la oyun barədə nə deyə bilərsiniz?
- Hesabda geridə olmağımıza, azlıqda qalmağımıza baxmayaraq, uşaqlar toparlana və yaxşı oyun sərgiləyə bildilər. İkinci hissədə yaxşı mübarizə getdi və sonda qol vurub, xal qazana bildik.
- Heç-heçə komandanızı qane etdi?
- Biz qələbəyə köklənmişdik. Çünki "Qəbələ" ilə üçüncü yer uğrunda mübarizə aparırıq. Amma "Sumqayıt"la oyun elə alındı ki, bu heç-heçəyə də sevinmək lazımdır.
- Siz artıq sağalmısınız?
- Artıq hər şeyin geridə qaldığını demək olar. Bir aya yaxın oynamadım. Təxminən beş məşqə çıxmışdım. Hələlik, oyun təcrübəsi baxımından problemim var. Amma meydana çıxdım, çalışdım, komandaya kömək etmək istədim. Mümkün qədər tez forma toplamaq istəyirəm ki, öz oyunumu göstərim.
- Azarkeşlər sizin oyununuzdan narazıdırlar və hesab edirlər ki, sizə verilən pullar hədər gedir...
- Azarkeşlərin də öz fikirləri var. Amma "Neftçi"yə gəlişimdən sonra bir sıra uğursuzluqla üzləşdim. Az şans qazanırdım, sonradan xəstələndim. Hələlik, öz oyunumu göstərə bilməmişəm.
- Bəs əvvəlki Rauf Əliyevi görmək üçün nə lazımdır?
- Mənim xüsusi problemim yoxdur. Sadəcə, oynamaq lazımdır ki, zamanla əvvəlki formama qayıdım.
- Millinin baş məşqçisi Robert Prosineçki "Neftçi"nin futbolçularını yığmada görmür. Onun bu qərarına sizin mövqeyiniz necədir?
- Bu barədə nəsə deyib, kiminsə xətrinə dəymək istəmirəm. Çalışacağam ki, öz oyunumla klubuma faydalı olum. Yalnız belə olan halda yığmaya dəvət ala bilərəm.
- Belə oyunla milliyə çağırılacağınızı düşünürsünüz?
- Dediyim kimi, hazırda formamdan çox uzağam. Həm də açıq danışsaq, komandamız bu gün zəif oynadı. Hər oyunda nə qədər qol vururuq, amma müdafiədəki səhvlər qələbə qazanmağımıza mane oldu.
