Cem Fələk: Azərbaycanla yanaşı, Türkiyə və Almaniya yığmasında da oynaya bilərəm
Şotlandiyanın "Aberdin" klubunun yarımmüdafiəçisi, Azərbaycanın U-19 yığmasının sabiq üzvü Cem Fələyin azerisport.az saytına müsahibəsi
- "Aberdin"dəki işləriniz necə gedir?
- Hər şey normaldır. Burada özümü çox yaxşı hiss edirəm. Turnir cədvəlində birinci yerdəyik. Çempionluğa oynayırıq. Qarşıda daha üç oyunumuz var.
- Növbəti mövsümdə sizi "Aberdin"in əsas heyətində görə biləcəyik?
- Bəli, biz də bunu planlaşdırırıq. Sadəcə, zamana ehtiyac var. "Aberdin" məni əsas komandaya cəlb etmək istəyir. Amma hələ burada qalıb-qalmayacağım dəqiq deyil. Mənim başqa variantlarım da var. Yaxşı oynamaq lazımdır.
- Niyə siz o vaxt Şotlandiya variantını seçdiniz?
- Bura gəldiyim üçün peşman deyiləm. Bura əla yerdir. Mən gəncəm və çətinliklərə alışmalıyam. Burada çox şey öyrəndim. Şotlandiyada əsl Britaniya futbolu oynanılır.
- Hansı variantlar var?
- Maraqlanan klublar çoxdur. Bu da təəccüblü deyil. Çünki bizim oyunlarımızı çoxlu skaut izləyir. Amma hələ heç nə dəqiq deyil. Klubumu dəyişməməyim də istisna deyil.
- "Xəzər Lənkəran"ın fəxri prezidenti Mübariz Mənsimovla əlaqə saxlayırsınız?
- "Xəzər Lənkəran" mənə bir vaxtlar çox kömək etdi. Azərbaycanda lənkəranlılara azarkeşlik edirəm. Amma cənab Mənsimovun özü ilə söhbətləşmirəm.
- Azərbaycan çempionatı ilə maraqlanırsınız?
- Vaxt olsa, maraqlanaram. Məndə də elə vaxt yoxdur. Burada Azərbaycan futbolu barədə heç nə danışılmır. Bütövlükdə, bütün informasiyanı atamdan alıram.
- Azərbaycan yığmasının yeni baş məşqçiyə tapşırılmasından xəbəriniz var?
- Xeyr, heç onu eşitməmişəm.
- Milliyə qayıtmaq barədə düşünmürsünüz?
- Mən Azərbaycan yığmasına kifayət qədər kömək etmişəm, amma faydasını görmədim. Sadəcə, bəzən insanlar səhvə yol verirlər ki, onu unutmaq çətin olur.
- Öz səhvinizdən danışırsınız, yoxsa, məşqçilərin?
- Orada sadəcə, anlaşılmazlıq var idi. Mən üç yığmada çıxış edə bilərəm - Almaniya, Türkiyə və Azərbaycan yığmalarında. Daha uyğun variantı seçəcəyəm.