Ekiqo Ehiosun: Nigeriya yığmasına dəvət almaq istəyirəm
"Qəbələ"nin hücumçusu Ekiqo Ehiosun bu komandadakı karyerasından, eləcə də Nigeriya yığmasına qayıtmaq perspektivindən danışıb. Azerisport.az sizi həmin müsahibə ilə tanış edir.
- Son illərdə karyeranızda nələr olub?
- Hər şey əladır. Təəssüflənməyimə səbəb olacaq bir şey yoxdur. Həyatım yaxşıdır. Həyatdan zövq almaq üçün əlimdən gələni edirəm.
- Avropa karyeranıza Türkiyədə başlasanız da, indi Azərbaycandasınız. Bu, necə oldu?
- Bəzən həyatda nələrinsə daha yaxşı olması üçün, dəyişikliyə ehtiyac yaranır. Heç nəyi öncədən proqnozlaşdırmaq olmur. Türkiyədə bəzi problemlərim var idi. Söhbət legionerlərə olan limitdən gedir. Üstəlik, birinci liqa klublarında futbolçuların maaşı da vaxtında ödənilmirdi, problemlər yaranırdı. Bu üzdən Azərbaycana getməyə qərar verdim.
- Bəs Azərbaycanda işlər necə gedir?
- Hər şey yaxşıdır. Çempionat gündən-günə inkişaf edir. Ən əsası isə burada futbol oynayıram. Çempionatda rəqabət var. Burada qazandığım təcrübədən yararlanmağa çalışıram. Baxmayaraq ki, burada daha çox inkişaf edən bir şəhər var - Bakı.
- Qazancınızdan razısınız?
- Bəli. Heç nəyi gizlətməyəcəm. Ümumiyyətlə heç nə qazanmamaqdan bu yaxşıdır.
- Vaxtilə siz Nigeriya futbolunun gələcək ümidlərindən hesab olunurdunuz. Amma qeybə çəkildiniz. Nə baş verdi?
- İtdim, hə? Siz elə düşünürsünüz? Mən Nigeriyanı tərk etmək məcburiyyətində qaldım. Amma buna görə təəssüflənmirəm. Ölkə mətbuatında işıqlandırılmamağım isə mənim itdiyim anlamına gəlməməlidir.
- Yığmaya qayıtmaq barədə düşünmürsünüz?
- Əlbəttə, düşünürəm. Əminəm ki, bunun da zamanı gələcək.
- Gələcək planlarınız necədir?
- Hələ bilmirəm. Mənə bir neçə təklif gəlib, onları dəyərləndirməyə çalışıram. Heç nə deyə bilmərəm. "Qəbələ" də mənə qalmağı təklif edib və cavabımı gözləyir. (Gbooza)