Yaşar Vahabzadə: Millidə hücumçu problemi var
Azərbaycanın gənclərdən ibarət yığmasının baş məşqçisi Yaşar Vahabzadənin azerisport.az saytına müsahibəsi
- Sizin gəlişinizdən sonra U-21-də nə dəyişib?
- Mən hələ Bernard Lippertin dövründən yığmadayam. Biz sadəcə, işimizi davam etdiririk. Komandada atmosfer yaxşıdır. Toplanış keçir, seçmə mərhələyə hazırlaşırıq. Farer adalarına qarşı oyunu gözləyirik.
- Siz komandada yeniliklər olacağını demişdiniz...
- "Dnepr"dən Dmitri Nağıyevi komandaya cəlb etmişik.
- Ondan razı qaldınız?
- Hələlik, onunla bağlı yekun qərara gəlməmişik. Düşünürük.
- Hazırda hansı futbolçuları diqqət mərkəzində saxlayırsınız?
- Ad çəkmək istəmirəm. Bizim əsas hədəfimiz yaxşı hücumçu tapmaqdır. Hücumçu problemimiz var. Bu problem elə klublarımızda da var.
- Siz klubsuz olan Bayram Budaqova dəvət göndərdiyinizə görə tənqid olunursunuz. Bunun səbəbini bilmək olar?
- Ehtiyacımız olduğuna görə dəvət edirik. Dediyim kimi, bizdə hücumçu problemi var.
- Almaniyada çıxış edən türklərə nə əcəb dəvət göndərmirsiniz?
- Əlbəttə, onları dəvət etmək olar. Yaxın günlərdə onların disklərinə baxacağam.
- Əsas yığmada çıxış etməyə layiq futbolçular var?
- Bunun üçün daha çox işləməyə ehtiyac var. Robert Prosineçki ilə də danışmışam. O, bəzi oyunçuları diqqət mərkəzində saxlayır.
- U-19-dan dəvət etmək istədiyiniz oyunçular var?
- Əlbəttə. Elnur Cəfərovu dəvət etmişik. O, Antalyada da bizimlə birgə idi.
- U-19-da sizə kömək edə biləcək hücumçu var?
- Bəli, var, Vadim Ağarəhimov. "Zenit"də oynayır.
- Daha kimi komandada görmək istərdiniz?
- Öz klublarımızda çıxış edən oyunçulardan da dəvət göndərmək istədiklərimiz var. Məsələn, AZAL-dan Seymur Əsədovu qeyd edə bilərəm. O, "Qarabağ"la oyunda çox gözəl qol vurdu.
- Millidən Farer adaları, Avstriya, Almaniya, Finlandiya və Rusiya ilə oyunlardan nə gözləyək?
- Öncədən heç nə demək istəmirəm. Biz döyüşkən komanda yaratmaq istəyirik. Çünki çox çətin rəqiblərimiz var.