Əsgər Abdullayev: Milli azarkeşləri küskün olsa da, dəstəklərini əsirgəməməlidirlər
Azərbaycan yığmasının sabiq baş məşqçisi Əsgər Abdullayevin azerisport.az saytına müsahibəsi
- Millimizin Malta ilə seçmə mərhələ oyunundakı şanslarını necə qiymətləndirirsiniz?
- Bu bayram günlərində hamımız yığmadan qələbə gözləyirik. Baş məşqçi də komanda üzvlərinə güvənir və qələbə gözləyir. Bu, böyük üstünlükdür. Futbolçular özlərinə inanmalı və qələbə üçün əllərindən gələni etməlidirlər.
- Rəqib barədə nə deyə bilərsiniz?
- Malta yığmamız səviyyəsində komandadır. Amma istənilən halda rəqiblə hesablaşmaq lazımdır. Onlara yuxarıdan aşağı baxmaq olmaz. Hər şeyi düzgün analiz etmək və düzgün qərarlar qəbul etmək lazımdır. Rəqibin bütün güclü və zəif cəhətlərini bilməliyik. Bütün bunlar nəzərə alınsa, qələbə bizim olacaq. Yığmamızda bir-iki futbolçuda ruh düşkünlüyü olan kimi, bu, bütöv komandaya təsir edir. Amma hər bir futbolçunun özünə inanması vacibdir.
- Robert Prosineçkinin futbolçulara Maltanın Gürcüstanla yoxlama oyununa baxmağa icazə verməməsi düzgün qərardır?
- Mümkündür ki, o, Maltanın Tiflisdə ən yaxşı oyununu sərgiləməyəcəyini düşünüb və futbolçuların arxayınlaşmaması üçün belə addım atıb. Amma istənilən halda rəqibin bu oyununun da ən yaxşı şəkildə analiz edilməsinə ehtiyac var. Əgər baş məşqçi belə addım atıbsa, deməli, bu, onun taktikasıdır. Çünki komandanın oyuna köklənməsindən çox şey asılıdır.
- Xorvat mütəxəssis futbolçularla oturub söhbətləşməyi, ünsiyyətdə olmağı çox xoşlayır. Sizcə, bu, oyunçulara müsbət təsir edən məqamdır, ya onlarda arxayınlığa səbəb ola bilər?
- Futbolçularla ünsiyyət qurmaq, onlara inanmaq qətiyyən arxayınlığa səbəb olmamalıdır. Futbolçular özləri də bunu başa düşməlidirlər. Əksinə, baş məşqçinin oyunçulara yuxarıdan aşağı baxması daha pis nəticələrə səbəb olur.
- Sizcə, Malta üzərində qələbə qazanmaq üçün nə lazımdır?
- İlk növbədə rəqibi düzgün qiymətləndirmək lazımdır. Onların güclü və zəif cəhətlərini tam araşdırıb, bundan yararlanmalıyıq. Əgər asan qələbə qazanacağımızı düşünsək, bu, bizim üçün pis nəticələnə bilər.
- "Neftçi"nin futbolçularının yığmaya dəvət almaması barədə nə deyə bilərsiniz?
- Gəlin bunu müzakirə etməyək. Prosineçkinin bu qərarının düzgün olub-olmadığını zaman göstərəcək. Yəqin ki, o da yığmamızdakı ilk oyunundan qələbə ilə ayrılmaq istəyir. Ona görə də öz seçimini edib. Bu, onun şəxsi qərarı olduğuna görə, bizim nəsə deməyimiz düzgün deyil.
- Komandamızın cari seçmə mərhələdəki ardıcıl məğlubiyyətləri azarkeşləri küsdürüb. Sizcə, qarşıdakı oyun vəziyyəti dəyişəcək?
- Əsl azarkeş komandanın həm çətin, həm də yaxşı günündə onun yanında olanlardır. Onlar millidən incik olsalar da, komandaya dəstəklərini nümayiş etdirməlidirlər. İstənilən halda bu, Azərbaycanın komandasıdır.
- Sizə hansısa klubdan təklif yoxdur?
- Sakitlikdir. Danışıqlar çoxdur, amma konkret təkliflər yoxdur. Gözləyirəm. Hər şeyin yaxşı olacağına ümidliyəm.
