Vəli Qasımov: Azərbaycan Maltaya da qalib gəlməyəcəksə, kimdən 3 xal alacaq?
Azərbaycan yığmasının sabiq hücumçusu Vəli Qasımovun azerisport.az saytına müsahibəsi
- PRO kateqoriyasını almağınız barədə nə deyə bilərsiniz?
- Ötən il bütün dərslərdə iştirak etdim. Hər şey yüksək səviyyədə alındı. A kateqoriyasına da Ukraynada yiyələnmişdim. Türkiyədə isə təcrübə keçdik. Çox şey öyrəndim.
- Bəs niyə PRO kateqoriyasına vətəndə yiyənləmədiniz?
- Bakıda cəmi iki ildir ki, belə kurslar təşkil olunur və burada səviyyə hələ istənilən kimi deyil. Heç kim üçün sirr deyil ki, Ukraynada futbolun səviyyəsi bizdəkindən daha yaxşıdır. Mən də yüksək səviyyədə təhsil almağa çalışdım.
- İştirakçısı olduğunuz kurslara Ukrayna futbolunun canlı əfsanəsi Andrey Şevçenko da qatılırdı. Onunla münasibətləriniz nə səviyyədə idi?
- Rəhbərlik bildirdi ki, bizim qrup ən güclülərdəndir. O da hər birimiz kimi bütün kurslarda iştirak etdi. Hər şeyi birgə etdik. Mütəmadi olaraq futbol oyunlarını müzakirə edirdik. Hamı buna peşəkarcasına yanaşırdı.
- Artıq PRO kateqoriyalı məşqçisiniz. Bundan sonra?
- Elə etmək lazımdır ki, bu lisenziya boşa getməsin. İş tapmaq lazımdır. Variantlar var, amma seçim etmək lazımdır.
- Yığma komandamızın Malta ilə oyunundan nə gözləyirsiniz?
- Mənim Robert Prosineçkiyə böyük ümidim var. Onun barəsində ancaq xoş sözlər eşidirəm. Ümid edirəm ki, o, yaxşı komanda yarada biləcək. Ona uğurlar arzulayıram. Hesab edirəm ki, indiki məqamda yığmamıza nəticədən daha çox yaxşı oyun sərgiləmək daha vacibdir.
- İstənilən halda Maltaya qalib gəlməyimiz lazımdır...
- Əgər onları da məğlub edə bilməyəcəyiksə, onda kimdən 3 xal alacağıq?
- Bəlkə də ilk dəfədir ki, "Neftçi"nin heç bir üzvü yığma komandaya çağırılmayıb. Siz bunu necə qarşıladınız?
- Buna təəccüblənmədim. Prosineçki öz seçimini edib. Mümkündür ki, Bakı klubunun oyunçuları onun gözündə lazım olan səviyyədə deyil. Buna normal yanaşıram.
