Vaqif Cavadov: Mənim üçün Bolusporda heç bir problem yoxdur
Azərbaycan yığmasının və Türkiyənin "Boluspor" klubunun hücumçusu Vaqif Cavadovun azerisport.az saytına müsahibəsi
- Son dövrlər baş məşqçiniz sizi daha çox ikinci hissədə oynadır. Sizə niyə daha çox güvənilmir?
- Burada söhbət güvənməkdən getmir. Məndə hər şey yaxşıdır. Tezliklə daha çox oynamaq şansı qazanacağam.
- Siz yəqin ki, bunun səbəbini bilirsiniz...
- Heç bir səbəb yoxdur. Məşqçilər korpusunun öz taktiki planları var. Həm də mən komandaya gec qoşulmuşam. Mənim üçün burada heç bir problem yoxdur.
- Mövsümün sonunda komandanızı dəyişmək fikriniz yoxdur?
- Düzü, məni burada hər şey qane edir. Klubla 6 ay+1 il şərti ilə müqavilə imzalamışam. Hələ bu klubdan ayrılmaqla bağlı heç bir planım yoxdur. Amma futbolçu həyatı elədir ki, hər şey dəyişə bilər.
- "Boluspor"la oyununuzu izləməyə Robert Prosineçki də gəlmişdi?
- Bəli. O, oyunu izlədi. Oyundan sonra isə görüşdük, söhbət etdik.
- Nə barədə?
- Deməyəcəyəm (gülür). Bu diqqətinə görə ona təşəkkürümü bildirirəm. Xoş oldu.
- Onunla söhbətinizdən dəqiqləşdirə bildiniz ki, Malta ilə oyuna dəvət alacaqsınız?
- Bu barədə heç nə deyə bilmərəm. Necə qərar qəbul edəcəyini özü bilər. Mən öz növbəmdə yalnız onu deyə bilərəm ki, milli komandanın düşərgəsinə getməyə hazıram. Lazım bilsələr, can-başla oynayaram.
- Yığmamızın Türkiyə toplanışını izləyirdiniz? Orada olmadığınıza görə təəssüflənmədiniz?
- Mən istəsəydim də klub buraxmazdı. Toplanışa gəlincə, uşaqlarla danışırdım. Hamısı yeni baş məşqçidən, onun işə münasibətindən razılığını bildirirdi. Prosineçki ilə görüşümüz zamanı da komanda yoldaşlarımın necə haqlı olduqlarının şahidi oldum. Prosineçki çox yaxşı insandır.