Mahmud Qurbanov: Norveç ilə oyundakı start heyətinə görə təəssüflənmirəm
Futbol üzrə Azərbaycan yığmasının baş məşqçi əvəzi Mahmud Qurbanov AÇ-2016-nın seçmə mərhələsi çərçivəsində Norveçə qarşı keçirilmiş oyunu şərh edib. Azerisport.az saytına açıqlamasında o, bunları söyləyib:
"Norveçlə oyundakı məğlubiyyətə görə təbii ki, özümü yaxşı hiss etmirəm. Oyundan öncə özümü daha yaxşı hiss edirdim, nəinki indi. Çünki ən azı bir xal qazana bilərdik. Məğlubiyyətə baxmayaraq, bu oyunda buraxdığım heyətə görə təəssüflənmirəm. Sadəcə, rəqib səhvsiz oynadı. Digər tərəfdən bir neçə gün ərzində nəyisə dəyişmək çox çətindi. Futbolçuların istəksiz oynadıqları barədə fikirlərlə də razı deyiləm. Onlar nə bacarırdılarsa, onu da etdilər. Baxmayaraq ki, çoxlu səhvlərə yol verdilər. Xüsusilə də ötürmələrdə. Bütövlükdə, pis oynadığımızı düşünmürəm".
