Elnur Məmmədov: Telefon ilə alınan müsahibələr emosiyaları əks etdirə bilmir
"Neftçi"nin vitse-prezidenti Elnur Məmmədovun azerisport.az saytına müsahibəsi
- “Neftçi”yə gələndən sonra ilk görüşdüyünüz şəxslər yaşlı azarkeşlər oldu. Həmin azarkeşlərlə görüşünüz gənc fanatların narazılığına səbəb olub. Onlarla da görüşməyi planlaşdırırsız?
- Bizimlə görüşmək istəyən istənilən fan-klub, azarkeş qrupu ilə görüşməyə hazırıq. Bu, həmişə də belə olacaq. Əsas məqsədimiz azarkeşi stadiona cəlb etməkdi.
- Amma hər şeyə rəğmən, "Neftçi"nin ev oyunlarında azarkeşlərin sayı yenə də çox deyil...
- Bu, sizin fikrinizdi. Biz hər bir fikirə hörmətlə yanaşırıq. Dediyim kimi, bu istiqamətdə işlər başlayıb. Qısa zamanda bunun nəticəsini görəcəyik. Hər oyundan sonra analizlərimiz olur. Hazırlıq prosesi gedir. Azarkeşləri tribunalara qaytarmaq istəyirik. Əsas məqsədimiz sabit olaraq həmin insanları avrokuboklara yox, daxili oyunlara da cəlb etməkdi.
- Bəs jurnalistlərlə necə işbirliyi qurmağı planlaşdırırsız?
- İstəyirik ki, media nümayəndələri də oyunlarımıza gəlsin, oyunöncəsi təşkil olunan mətbuat konfranslarında, “miks zona”larda iştirak etsin. Bu, komandamıza əlavə stimul verir.
- Yəni telefonla müsahibə almağa qadağa qoymusuz?
- Jurnalist telefonla müsahibə alanda, həmin oyundan sonra alınan emosiyaları əks etdirə bilmir. Ona görə də media zonada jurnalistlərə istənilən şərait yaradılacaq. Yüksək surətli internetlə işləmək imkanı yaradılacaq. Oyundan sonra da canlı olaraq müsahibə alıb, mənsub olduğunuz mediada yayımlaya biləcəksiz.
- “Neftçi”də 1 aylıq fəaliyyətiniz tamam oldu. Bu 1 ay ərzində hansı işləri görmüsüz?
- Mümkünsə, bu suala cavab verməyim. Çünki müəyyən işləri ortaya qoyduqdan sonra bu haqda müzakirə aparmaq olar. Burada ümumi komanda fəaliyyət göstərir və bu istiqamətdə də fəaliyyətimiz davam edir.
- Sizə elə gəlmir ki, "Bakı" ilə oyunda Kanalesin yerinə ilk dəqiqələrdən etibarən gənc və istəkli Ruslan Qurbanov meydanda olmalı idi?
- Hər bir məşqçi hər oyuna öz taktikası ilə çıxır. Məşqçimiz hər bir rəqibə uyğun taktika seçir. "Bakı" ilə oyunun nəticəsi də göstərdi ki, o, düzgün seçim edib.