Zaur Axundov: Ukrayna mətbuatı yalan yazır
Azərbaycan Futzal Federasiyasının prezidenti Zaur Axundovun azerisport.az saytına müsahibəsi
- AÇ-2016-nın seçmə mərhələsinin püşkünü necə dəyərləndirərdiz?
- Belçikaya qarşı heç vaxt oynamamışıq. Ukrayna isə bizim üçün tanış rəqibdi. İlkin mərhələdən də Bolqarıstanla Yunanıstanı gözləyirik. İstənilən halda, bizə asan olmayacaq. Heyətimiz çox dəyişik. Yığmaya 7-8 gənc futbolçu cəlb olunub. Dekabr və yanvarda təlim-məşq toplanışlarımız olacaq. Komandanın qarşısına ardıcıl dördüncü dəfə Avropa Çempionatına vəsiqə qazanmaq vəzifəsi qoyulacaq.
- Braziliyalılarsız çətin olmayacaq?
- Şübhəsiz ki, çətin olacaq. Yığmanın 80 faizi yerli futbolçulardı. Azərbaycan millisində maksimim 2-3 braziliyalı görəcəksiz. Amma baş məşqçiyə də demişəm ki, millidə əsas yerlilərə üstünlük verilməlidi.
- Hansı baş məşqçiyə? Ukrayna mətbuatı Joze Alesionun Qazaxıstan "Kayrat"ına keçmək üzrə olduğunu deyir...
- Mən də bu barədə oxumuşam və sizə deməliyəm ki, Ukrayna mətbuatı yalan danışır. O, heç yerə getmir. Alesio "Araz" klubunda və yığmamızdakı işini davam etdirəcək. Braziliyalı mütəxəssis beş ildən çoxdu ölkəmizdədi və çoxlu uğurlara imza atıb. Onun indi yığmaya cəlb olunan gənc futzalçılarımızın da inkişafında az rolu olmayacaq.
- Onunla müqavilənin müddəti nə vaxt bitir?
- Bizim onunla mayın sonunadək müqaviləmiz var.
- Ölkə çempionatının ilk turu qalmaqalla yadda qaldı...
- Belə olaylar bütün idman növlərində yaşanır. Bütün komandalar iddialıdılar. Ona görə belə mübahisələr hələ çox olacaq. Özüm də bütün prinsipial oyunlarda iştirak etməyə çalışıram ki, çatışmazlıqları görüm. Rəqabət artıb və hər kəs çempion olmaq istəyir.