Nazim Süleymanov: Mahir və Vaqifin dedikləri etik normalara ziddi
Futbol üzrə Azərbaycan yığmasının sabiq məşqçisi Nazim Süleymanovun azerisport.az saytına müsahibəsi
- Gəzən xəbərlərə inansaq, siz hazırda Lənkərandasız və "Xəzər Lənkəran"ın idman direktru vəzifəsinə təyin olunmusuz...
- Lənkərandayam? Zarafat edirsiz? Mənim bu klubun rəhbərliyi ilə heç bir görüşüm omayıb. Əgər baş məşqçi vəzifəsini təklif etsələr, həmişə hazıram.
- Ola bilər də klub rəhbərliyi ilə haradasa yolunuz kəsişib...
- Mən heç XL rəhbərliyi ilə sonuncu dəfə harada və nə vaxt görüşdüyümü xatırlamıram.
- Ümumiyyətlə, bu komandanın idman direktoru olmaq perspektivi barədə nə deyə bilərsiz?
- Mən ki idman direktoru təyin olunmamışam. Belə bir vəzifədə heç vaxt çalışmamışam da. Ona görə bu barədə nəsə deməyim düz deyil.
- İlk oyunda Serbiya "Partizan"ına 2:3 hesabıyla uduzan "Neftçi"nin Avropa Liqasının qrup mərhələsinə yüksəlmək şanslarını necə qiymətləndirirsiz?
- Şanslar yaxşıdı. İlk oyunun nəticəsi cavab oyunu öncəsi çox sərfəlidi. Əgər komanda Belqraddakı oyunun ilk 20 dəqiqəsindəki kimi oynasa, qələbə qazana bilər. Azarkeşlərin də üzərinə böyük məsuliyyət düşür. Komandanı dəstəkləmək lazımdı.
- Bəs "Qarabağ"?
- "Tvente" "Zalsburq" qədər güclü deyil. Düzdü, bu komanda öz meydanında Bakıdakından daha yaxşı oynayacaq. Amma hollandlara yenə çətin olacaq. Çünki istənilən qollu heç-heçə "Qarabağ"a sərf edəcək. Bu üstünlükdən yararlanmaq lazımdı.
- Kimin qrup mərhələsinə düşmək şansı daha çoxdu?
- Təmsilçilərimizi fərqləndirmək istəməzdim. Hər ikisinin bunun üçün yaxşı şansı var. Niyə də bu şanslardan yararlanmayaq? Optimist olmaq və inanmaq lazımdı. Bizim klublar BATE-dən zəifdi, ya Premyer Liqamız Belarus çempionatından geri qalır?
- Azərbaycan və Özbəkistan yığmaları arasındakı yoxlama matçından sonra komandamızın üzvləri Mahir Şükürovla Vaqif Cavadov o qədər legionerdənsə Reynaldonun milliləşdirilməsinin daha faydalı olduğunu demişdi. Bu fikirlə razısız?
- Futbolçu öz yerini bilməlidi. Onlar öz oyunlarına fikir versələr, daha yaxşı olar. Bu, etik normalara ziddi. Qoy milliyə hansı futbolçuların çağırılacağına məşqçilər korpusu diqqət yetirsin, bu, onların işi deyil.
- Qarşıda yığmamızı Rusiya ilə yoxlama, Belarusla AÇ-2016-nın seçmə mərhələ oyunu gözləyir...
- Rusiya ilə oyun AÇ-nin startı öncəsi komandamız üçün yaxşı yoxlanış olacaq. Berti Foqts bu matçda bolqarlarla oyun üçün start heyətini müəyyənləşdirə bilər. Dəstək olmaq, kömək etmək lazımdı. Bu, Foqtsun yox, Azərbaycanın komandasıdı.