Sadıq Sadıqov: Çixura komanda deyil
"Neftçi"nin prezidenti Sadıq Sadıqov Avropa Liqasının üçüncü təsnifat mərhələsi çərçivəsində Çürcüstan "Çixura"sına qarşı keçirdikləri ilk oyunundan sonra fikirlərini açıqlayıb. Azerisport.az saytına açıqlamasında o, qolsuz bitən qarşılaşmanı belə şərh edib:
"Oyunumuz alınmadı. Amma yaxşı ki, qol buraxmadıq. Cütün taleyini Gürcüstanda həll edəcəyik. Bu günkü futbol olmadı. Rəqib oyunun böyük hissəsini qapısının ağzında "yatdı".
"Komandama inanıram. Əminəm ki, "Koper" kimi, bu komandanı da keçəcəyik. "Çixura"ya gəlincə, bu, komanda deyil. Gürcüstanda başqa "Çixura" görəcəyik. Evdə də belə qapana bilməzlər. Açıq futbol oynamağı sevirik. Yəqin ki, səfərdə məhz belə oyun görərik. Qapalı futbol sərgiləyən komandalara qarşı pis oynayırıq".
"Neftçi"nin prezidenti tribunalarda yaşanan xəritə qalmaqalına da aydınlıq gətirib: "Biz oyun ərəfəsində onlara hər cür kömək etdik. Bakıya hazırlıqsız gəlmişdilər, avtobus sifariş etməmişdilər. Azərabycanla Gürcüstan dost ölkələrdi. Amma onların azarkeşləri separatçı xəritə açırlar. Bu, nəyə lazım idi ki? Axı biz dostuq".
O, həmçinin Tahir Süleymanovun istefasına da toxunub: "O, getdi, amma bizə kömək edir. Ona görə bu gün bizimləydi. Biz ki xalq komandasıyıq, bizə hamı kömək edir".
"Koper"lə oyun ərəfəsində yuxu görmüşdüm ki, "Koper"i keçəcəyik. Elə də oldu. Gürcüstanda da qələbə qazanacağıq. Minimum 2:1 hesabıyla qalib gəlməliyik. Təkrar edirəm ki, "Çixura" komanda deyil".
Sadıqov sonda onu da qeyd edib ki, komandası Avroliqanın pley-off mərhələsinə vəsiqə qazansa, ev oyunlarını Tofiq Bəhramov adına Respublika stadionunda keçirəcəklər.