Georgi Nikolov: Özümüz günahkarıq
"İnter"in prezidenti Georgi Nikolov Avropa Liqasının ikinci təsnifat mərhələsi çərçivəsində İsveç "Elfsborq"una qarşı keçirilmiş cavab oyunundan sonra azerisport.az saytının suallarını cavablandırıb.
- Bu dəfə hissləriniz sizi yanıltdı...
- Bu, oyun zamanı komandaya kömək etmir. Amma bu oyunun hakimliyinin bərbad olduğunu qeyd etməliyəm. Bunu heç kim gözləmirdi. Oyundan öncə zarafat edirdilər ki, hakimlər Bolqarıstandandısa, onlar bizə kömək edəcəklər. Amma hər şey əksinə oldu. Baş hakim elə ilk dəqiqələrdən oyunumuzu korladı.
- Qırmızı vərəqə olmasaydı, hər şey fərqli ola bilərdi?
- Siz özünüz də bu barədə nəticə çıxara bilərsiz. Azlıqda qalmasaydıq, oyun tam fərqli ssenari ilə cərayan edəcəkdi. Lazımsız qol buraxdıq. Baxmayaraq ki, bu, öz səhvimiz idi. Kifayət qədər qol vurmaq şanslarımız olsa da, yararlana bilmədik. İlk oyuna bənzərlik çox idi. Bizə oyunun taleyini həll edə biləcək futbolçu lazımdı.
- Beləsi yoxunuzdu?
- Təəssüf ki, yox. Rəqibin də haqqını vermək lazımdı. Onlar bura gəzintiyə gəlməmişdilər. Amma biz azlıqda da olsaq, daha yaxşı görünürdük. Xüsusilə də hücum planında.
- Baş məşqçiniz oyundan sonra istefa verdiyini açıqladı...
- Birincisi mətbuat önündə istefa qərarını açıqlamağı düzgün saymıram. Bunu rəhbərliklə kişi söhbətində etmək lazımdı. İkincisi isə mən onu buraxmağa hazırlaşmıram.
- Kaxaber Sxadadze onsuz özü də deyib ki, rəhbərlik istefamı qəbul etsə, gedəcəm...
- Gəlin onda mən də baş məşqçimizə elə sizin qarşınızda cavab verim ki, onun istefası ilə razı deyiləm. İndi soyuqqanlı olmaq və hər şeyə kişi kimi yanaşmaq zamanıdı. Məğlubiyyət həyatın bir hissəsidi. O, bu komandanı kimə saxlamaq istəyir ki?
- Sxadadzenin sözlərinə görə, o, avrokubokların qrup mərhələsində oynamaq istəyir...
- Mən özüm də orada olmağı çox arzulayıram (gülür). Bu oyundan sonra çox şey danışa bilərik. Özümüz də günahkarıq. İmkan düşəndə, vurmaq lazım idi.
- Amma "İnter" yenə ikinci mərhələdə mübarizəni dayandırdı...
- Heç özüm də nə deyəcəyimi bilmirəm.