AFFA prezidenti: Qarabağ Zalsburqu da keçməlidi
AFFA prezidenti Rövnəq Abdullayev Azərbaycan çempionu "Qarabağ"ın Çempionlar Liqasının ikinci təsnifat mərhələsində Malta "Valletta"sı üzərindəki qələbəsini şərh edib. Azerisport.az xəbər verir ki, futbol təsərrüfatımızın rəhbəri öncə bunları söyləyib:
"Klublarımızın Bakıda belə hesabla qələbə qazanması yadıma gəlmir. Bütün futbolsevərləri təbrik edirəm. Ümid edirəm ki, bu zəfərin davamı gələcək və komandamız Çempionlar Liqasının qrup mərhələsində çıxış edəcək".
AFFA prezidenti maltalıların kobud oyununa da toxunub: "Qarabağ" rəqib futbolçuların kobudluğuna öz qolları ilə cavab verdi. Komandamız səfərdəki kimi, evdə də yaxşı oynadı. Bu tempdə də davam etmək lazımdı. Oyundan sonra futbolçulara da dedim ki, sabah (bu gün) Qarabağın işğalı günüdü. Ona görə də bu qələbə bütün ağdamlılar üçün bir təsəlli oldu".
Abdullayev ağdamlıların növbəti təsnifat mərhələsindəki rəqibi - Avstriya "Zalsburq"u barədə bunları deyib: "Avstriya çempionu güclüdü. Bu, artıq "Valletta" deyil. Ağır olacaq. Hazırlaşmaq və onları da keçmək lazımdı".
AFFA rəhbəri Avropa Liqasındakı təmsilçilərimizin - "İnter"lə "Neftçi"nin də şanslarına toxunub: "İnter"in səfərdəki qələbəsindən sonra mərhələ adlamaq üçün yaxşı şansı var. İsveç klubunu evdə də məğlub etmək lazımdı. Baxaq görək "Neftçi" nə edəcək. Onlara çətin olacaq. Amma onlar da mərhələ keçə bilərlər".
ARDNŞ-in prezidenti "Neftçi"nin Sloveniya "Koper"i ilə ilk oyununa gəlməməsinin də səbəbini açıqlayıb: "Mənim ARDNŞ-ə rəhbərlik etməyim o demək deyil ki, "Neftçi"yə azarkeşlik edirəm, bu komandanın bütün oyunlarına getməliyəm. Mən bütün klublarımıza azarkeşlik edirəm. Həm də unutmayın ki, mən artıq "Neftçi"nin prezidenti deyiləm".
AFFA prezidenti arenanı erkən tərk edən azarkeşlərdən də danışıb: "Matçın başa çatmasını gözləmədən stadionu tərk etməyə başlayan azarkeşlərə etirazımı bildirmək istərdim. 76-cı dəqiqədə stadionu tərk etmək nə dərəcədə düzgündü? Mənə gəlincə, "Qarabağ"ın növbəti ev oyununa da gələcəm".
