XL sensasiya, Rəvan sürpriz edə bilmədi
Azərbaycan kubokunun cari mövsümünün finalçılarının adı artıq məlumdu. Azerisport.az xəbər verir ki, ötən gün keçirilən yarımfinal oyunlarında demək olar ki, gözlənilən nəticələr qeydə alındı.
Öncə "Rəvan" doğma meydanda "Neftçi" ilə qarşılaşıb. Mərhələnin sürpriz komandası olan Bayıl klubu ilk görüşdən sərfəli nəticə ilə dönmüşdü. "Bakcell Arena"dakı görüş 1:1 hesabı ilə yekunlaşmışdı. "Rəvan"ın turnir cədvəlindəki mövqeyi komandaya mənfi təsir etsə də, kubokun bu mərhələsinə qədər yüksəlmək Bayıl təmsilçisi üçün əlavə stimul sayıla bilərdi. İlk oyunun nəticəsi Güvənç Kurtarın yetirmələrini qane etsə də, "ağ-qaralar"ın ürəyincə deyildi. Son 3 ilin çempionunun turnir cədvəlindəki yerini nəzərə alsaq, Böyükağa Hacıyev tək titulunu kubokda qazana bilərdi. Qolsuz heç-heçə və istənilən hesablı qələbə meydan sahiblərini finala daşıyacaqdı. "Neftçi" isə ya qələbə qazanmalı, ya da 2:2 və ya daha çox qollu heç-heçəyə imza atmalıydı. Amma 90 dəqiqənin tamamında Hacıyevin komandası 3:1 hesablı inamlı qələbəyə imza atdı. Nəticədə, "Neftçi" Azərbaycan kubokunun ilk finalçısı oldu. "Rəvan" isə yarımfinalda mübarizəni dayandırdıqdan sonra artıq bütün diqqətini Premyer Liqaya yönəldə bilər.
Növbəti oyunda isə "Xəzər Lənkəran" və "Qəbələ" komandaları üz-üzə gəldi. Premyer Liqada heç bir iddiası qalmayan cənublular 10 illiyində yalnız kuboku qazanmaq arzusundaydı. Lakin ilk oyundan sonra "ağ-yaşıllar"ın bu istəyinin baş tutmayacağı böyük ölçüdə bəlli idi. Qəbələdə qeydə alınan 0:3 hesablı məğlubiyyət Mustafa Dənizlinin komandasının kubokdakı ümidlərinin də üstündən xətt çəkmişdi. Lənkəran təmsilçisinin oyunu ən azı əlavə vaxta aparması üçün 90 dəqiqəni 3:0 hesabıyla qalib başa vurması lazım idi. "Qəbələ"də isə üzlərin güldüyünü demək olardı. Doğma meydanda rəqib qapısından 3 cavabsız top keçirən Yuri Syominin komandası bu görüşə daha rahat çıxmışdı. Elə bunun məntiqi nəticəsi idi ki, oyunu müdafiədən quran qonaqlar əks-hücumların birində hesabı açdı. Mustafa Dənizlinin komandası isə qalan vaxt ərzində yalnız bu bir qolun əvəzini çıxa bildilər. Nəticədə, qarşılaşma heç-heçə bitdi. Finala isə "Qəbələ" yüksəldi.
Qeyd edək ki, "Qəbələ" və "Neftçi" arasındakı final qarşılaşması mayın 22-də keçiriləcək.
Azərbaycan kuboku
Yarımfinal (cavab oyunları)
RƏVAN - NEFTÇİ - 1:3 (ilk oyun - 1:1)
Qollar: Xuan Manuel Varea, 17 - Ruslan Qurbanov, 10, Flavinyo, 19, Bruno Bertuççi, 55.
Sarı vərəqələr: Kamil Kopunek, 42 (qeyri-idman hərəkəti); Hüseyn Axundov, 54 (sistematik qayda pozuntusu); Tyaqo Mirasema, 86 (qeyri-idman hərəkəti) - Rəşad Sadiqov, 53 (qeyri-idman hərəkəti); Flavinyo, 82 (qeyri-idman hərəkəti).
Hakimlər: Əliyar Ağayev, Zeynal Zeynalov, Namiq Hüseynov, Orxan Məmmədov.
Əlavə köməkçi hakimlər: Ramil Əhmədov, Ömər Paşayev.
AFFA nümayəndəsi: Ramiz Abdullayev.
Hakim-inspektor: Xaqani Məmmədov.
Artırılan vaxt: I hissədə - 2 dəq.; II hissədə - 3 dəq.
24 aprel 2014. Saat 17:00. “Bayıl Arena” stadionu. 500 tamaşaçı.
Rəvan: 1. Lukas Sapela, 4. Mitya Moreç, 7. Elvin Həsənəliyev, 8. Julio Sezar, 14. Xuan Manuel Varea (10. Tyaqo Mirasema, 67), 18. Oke Akpoveta, 19. Hüseyn Axundov, 21. Novruz Məmmədov (k), 25. Ayaz Mehdiyev (17. Ramazan Abbasov, 85), 40. Mişel Balokoq, 41. Kamil Kopunek.
Ehtiyat oyunçular: 85. Kamal Bayramov, 11. Kamil Nurəhmədov, 20. Miloş Adamoviç, 24. Yamin Ağakərimzadə, 28. Boyan Markoviç.
Baş məşqçi: Güvenc Kurtar.
Neftçi: 30. Saşa Stamenkoviç, 2. Karlos Kardoso, 6. Rəşad Sadiqov (k), 7. Araz Abdullayev (8. Elşən Abdullayev, 76), 9. Flavinyo, 15. Erik Ramos, 16. Bruno Bertuççi, 23. Ruslan Qurbanov (10. Cavid İmamverdiyev, 70), 27. Məqsəd İsayev, 32. Elvin Yunuszadə, 90. Ernest Nfor (21. Samir Məsimov, 82).
Ehtiyat oyunçular: 24. Ruzi Qiyaslı, 3. Denis Silva, 4. Tərlan Quliyev, 5. İqor Mitreski.
Baş məşqçi: Böyükağa Hacıyev.
XƏZƏR LƏNKƏRAN - QƏBƏLƏ - 1:1 (ilk oyun - 0:3)
Qollar: Junior Nildo, 54 - Viktor Mendi, 21.
Sarı vərəqələr: Tyeqo de Xesus, 16 (qeyri-idman hərəkəti) - Nizami Hacıyev, 11 (qeyri-idman hərəkəti); Kamran Ağayev, 59 (oyunun bərpasını gecikdirdiyinə görə); Daniel Subotiç, 63 (qeyri-idman hərəkəti); Ürfan Abbasov, 90+3 (qeyri-idman hərəkəti).
Hakimlər: Rəhim Həsənov, Yaşar Abbasov, Rza Məmmədov, Vüsal Əliyev.
Əlavə köməkçi hakimlər: Elvin Əsgərov, İnqilab Məmmədov.
AFFA nümayəndəsi: Abbas Hüseynov.
Hakim-inspektor: Gülağa Cabarov.
Artırılan vaxt: I hissədə - 1 dəq.; II hissədə - 4 dəq.
24 aprel 2014. Saat 19:00. “Xəzər Lənkəran” mərkəzi stadionu. 5000 tamaşaçı.
Xəzər Lənkəran: 1. Orxan Sadıqlı, 3. Vanderson Skarduelli, 5. Tyeqo de Xesus, 6. Rasim Ramaldanov (18. Tural Cəlilov, 65), 7. Sadio Tounkara, 10. Elnur Abdullayev, 11. Zohair Benuahi (30. Elias Ribeyro, 73), 12. Junior Nildo, 14. Rahid Əmirquliyev (k), 20. Etame Mbilla, 27. Adrian Skarlatake.
Ehtiyat oyunçular: 19. Vyekoslav Tomiç, 2. Slavik Alxasov, 4. Alvaro Silva, 8. Deyan Blajevski, 23. Nikola Qliqorov.
Baş məşqçi: Mustafa Dənizli.
Qəbələ: 1. Kamran Ağayev (k), 8. Nizami Hacıyev, 9. Viktor Mendi, 10. Dodo, 14. Lorenzo Ebesilio (22. Lourival Assis, 81), 16. Ruslan Tağızadə, 18. İbrahima Niasse, 31. Daniel Subotiç (19. Abdulvahid Afolabi, 78), 34. Ürfan Abbasov, 44. Rafael Santos, 46. Davronjon Erqaşev (45. Murad Musayev, 88).
Ehtiyat oyunçular: 30. Anar Nəzirov, 2. Rail Məlikov, 6. Vladimir Levin, 42. Leonardo da Silva.
Baş məşqçi: Yuri Syomin.
