Qarabağ 2013-ün ən yaxşısını seçdi
26 dekabr 2013 16:44
Artıq 2013-cü il geridə qalmaq üzrədir. Azerisport.az xəbər verir ki, hər olduğu kimi “Qarabağ” futbol klubu ilin ən yaxşılarını seçdi.
Ənənəvi olaraq sorğuda klubun idarə, texniki və inzibati heyəti qatıldı. Səsvermə bir qədər standardlardan fərqlənib. 2013-də meydana çıxan 20 futbolçunun seçilmə imkanı vardı (2013-ün ilk yarısında “Qarabağ” da çıxış edənlər səsverməyə daxil edilməyib). Öncədən müəyyənləşmiş 20 futbolçu 20 ballıq sütunla qiymətləndirilirdi. Yəni, 20-ə qədər xal 20 futbolçu arasında paylaşdırılmalı idi. Klubun direktoru Emrah Çelikel və baş məşqçi Qurban Qurbanovun da qatıldığı sorğu olduqca maraqlı alındı. Maraqlıdır ki, ötən illərə müqayisədə bu dəfə qalib böyük fərqlə qələbə qazandı. Bəli, gözlənildiyi kimi “Qarabağ”ın braziliyalı forvardı Reynaldo klub çalışanlarının rəğbətini qazanaraq ilin ən yaxşısı seçildi. Rekord səslə birinci olan 24 yaşlı hücumçu 1 istisna ilə hər kəsdən maksimum xal alıb. Reynaldo elə ilin əvvəlində komandaya qoşulub. “Anderlext”dən transfer edilmiş ön xətt oyunçusu ilin ilk yarısında cəmi 2 qol vursa da, həm kubok, həm də çempionatda hücum xəttində effektliliyi ilə komandaya böyük fayda gətirmişdi. Bu mövsüm isə fırtına kimi başlayan Reynaldo avrokuboklarda 5, premyerliqada 7, kubokda isə 1/4 finala yüksəlməyə səbəb olan yeganə qola imza atıb. 2008-ci ildən keçirməyə başlanan sorğuda Admir Teliden sonra il sonunda klub çalışanlarının rəğbətini qazanan 2-ci əcnəbi oldu.
2-ci və 3-cü yerlər arasında isə ciddi mübarizə qeydə alınıb. Ötən 3-cü olan Riçard Almeyda 2-ciliyi sadəcə 2 xalla Rəşad Sadıqovu qabaqlamaqla əldə edib. İlk 5-liyi isə ötən ilin qalibi Vüqar Nadirovla Qara Qarayev tamamlayıb.
Bütün qaliblər:
2008 - Maksim Medvedev;
2009 - Vaqif Cavadov;
2010 - Rauf Əliyev;
2011 - Admir Teli;
2012 - Vüqar Nadirov.
