Elnur Abdullayev: Neftçi ötən mövsüm indikindən daha güclü idi
22 oktyabr 2013 11:24
“Xəzər Lənkəran”ın futbolçusu Elnur Abdullayev azerisport.az saytına müsahibəsində Azərbaycan Super Kubokundan, “Neftçi”nin oyunlarından və Flavinyodan danışıb.
- Naxçıvanda hazırlıq necə gedir?
- Biz Naxçıvana oyundan 2 gün əvvəl gəlmişik. Artıq ilk məşqimizi də başa vurduq. Süni örtüklü meydançada hazırlıq keçdik. Sabah (bu gün) matçın keçiriləcəyi stadionla tanış olacağıq. Hava yaxşıdı. Komandamızda atmosfer əladı. Demək olar ki, hamı Super Kubok oyununa motivasiya olunub. Kuboku Lənkərana aparmaq istəyirik. Bunun üçün 90 dəqiqə rəqibdən yaxşı oynamağa çalışacağıq.
- “Neftçi” çempionata daha uğurlu başlayıb. Bu mənada rəqibi daha şanslı saymaq olar?
- Deməzdim. Şanslar bərabərdi. “Xəzər Lənkəran” çempionatda baxımlı futbol oynayan 2-3 komandadan biridi. Sadəcə nəticə yoxdu. Yaxşı oynasaq da, nəticə qazana bilmirik. Real qol şansı yaradırıq, amma fərqlənmirik. Ona görə Super Kubok uğrunda görüşdə maksimum güc sərf edərək qələbə qazanmağa çalışacağıq.
- “Neftçi” ötən mövsüm güclü idi, yoxsa cari çempionatda?
- Düzünü desəm, “Neftçi” ötən mövsüm daha güclü idi. Komanda daha inamlı təsir bağışlayırdı. Bəlkə, komandada hansısa problem var. Rəqib haqda danışmaq istəməzdim. Lakin hamı görür ki, “Neftçi” ötən ilki komanda deyil.
- Super Kubok müəyyən mənada azarkeşlərinizi sevindirə bilər...
- “Xəzər Lənkəran”ın azarkeşləri həmişə yaxşı mənada seçilib. Onlar hər zaman bizi dəstəkləyiblər. Biz onlara qələbə borcluyuq. Ötən mövsüm mükafatsız qaldıq. Super Kubok azarkeşlərlə barışmaq üçün şansdı. “Neftçi”ni məğlub edərək qələbə qazansaq, fanatlar çox sevinəcək. Bu sevinci onlara bəxş etmək üçün oynamağa dəyər.
- Amma sadiq azarkeşləriniz Naxçıvana gələ bilməyəcək. Uzaq məsafə müəyyən mənada maliyyə tələb edir...
- Fanatlar evdə olsalar belə, onların dəstəyini hiss edəcəyik. “Xəzər Lənkəran” hər yerdə dəstək hiss edib. Heç zaman fanatlarsız qalmamışıq. Komanda Naxçıvanda da dəstəksiz olmayacaq. Əminəm ki, Naxçıvanda da bizim fanatlar var. Oyuna köklənərək yalnız qələbə haqda düşünürük.
- Nəticə barədə proqnoz verə bilərsiz?
- Bizə istənilən hesablı qələbə sərf edir. Əgər “Xəzər Lənkəran” oynayırsa, deməli çoxlu qol olacaq. Biz rəqibə açıq futbol təklif edəcəyik. Etiraf edirəm ki, “Neftçi”nin heyətində kifayət qədər səviyyəli futbolçu var. Elə Flavinyo nəyə desəniz, dəyər. Fikrimcə ən güclü silahları elə braziliyalıdı. Əgər onu diqqətdən kənarda qoysaq, bizə problem yaradacaq.
- Kubokun finalında hər şey penaltiylə həll olundu. Onda qalmaqal oldu və “Neftçi” qələbə qazandı...
- Bu dəfə penalti olmasını istəməzdim. Oyunun taleyini penaltiyə saxlamaq olmaz. Hər şeyi 90 dəqiqədə həll etmək lazımdı. Komandamız əsas vaxtda qol vurmaqla qələbəyə layiq olduğunu göstərməlidi. Penalti lotoreyadı və ona ümid etmək olmaz. 2 hissə qol vurmaq üçün vaxtımız olacaq. Super Kubokda penalti barədə düşünmürük və 90 dəqiqədə qələbə qazanacağımıza əminik.