Barcelonanın sabiq üzvü rəsmən Xəzər Lənkəranda! (FOTO)

“Xəzər Lənkəran” daha bir futbolçunun transferini rəsmiləşdirib. Azerisport.az xəbər verir ki, ispan futbolçu Eduard Oriol Qrasiya bundan sonra cənub təmsilçisinin şərəfini qoruyacaq.

 

26 yaşlı yarımmüdafiəçi karyerasına Kataloniya klubu olan "Pobla Mafumet"də başlayıb. Ardından Oriol bu bölgənin digər komandası "Sant Andreu"da bir mövsüm ərzində çıxış edib. Həmin mövsümü olduqca uğurlu keçirən futbolçu "Barcelona"nın diqqətini cəlb edib. 2009-2011-ci illərdə "Barcelona”nın B komandasında oynayan Edu bu komandanın “Sequnda”ya vəsiqə qazanmasında əsas rol oynayanlardan biri olub. Bir neçə dəfə "Barcelona”nın əsas komandasının heyətinə də cəlb olunan oyunçu, ümumilikdə İspaniyanın ikinci divizionu olan "Sequnda"da 60 çempionat oyununda 9 dəfə fərqlənib.

 

2011-ci ildə isə sol cinah yarımmüdafiəçisi olan Oriol La Liqada çıxış edən “Zaragoza”ya keçib. Araqon klubunun tərkibində bütün turnirlərdə 45 oyun keçirən futbolçu bundan sonra “Xəzər Lənkəran”da legioner həyatı yaşayacaq.

 

Edu Oriolla "Xəzər Lənkəran" arasında iki il müddətinə müqavilə imzalanıb.