Avropa Qran Prisinə media akkreditasiyası ilə əlaqədar növbəti seminar baş tutdu
Bakı Şəhər Halqası Əməliyyat Şirkəti (BŞH) yerli Kütləvi İnformasiya Vasitələrinin (KİV) nümayəndələri üçün Avropa Qran Prisinə media akkreditasiyası haqqında sonuncu məlumatlandırma seminarını keçirib. Azerisport.az xəbər verir ki, görüş zamanı BŞH-nın Media Əməliyyatları üzrə meneceri Ayan Ağayeva jurnalistlərə akkreditasiya prosesi ilə birlikdə qeydiyyat üçün tələb olunan keyfiyyətlər barəsində ətraflı məlumat verib və media akkreditasiyasına dair jurnalistləri maraqlandıran sualları cavablandırıb.
Daha sonra çıxış edən Avropa Qran Prisinin rəsmi elçisi Rəhim Əliyev Formula 1 jurnalistikasının incəliklərindən danışdı və bu ilki çempionatla bağlı son yenilikləri tədbir iştirakçılarına çatdırıb.
Seminar BŞH-nın Marketinq və Kommunikasiya şöbəsinin rəhbəri və Formula 1 Avropa Qran Prisinin Milli Mətbuat Katibi Nigar Arpadarainin çıxışı ilə davam edib. Əməliyyat şirkətinin sözcüsü Avropa Qran Prisinə hazırlıqla əlaqədar görülən işlərdən söz açıb və qeyd edib ki, son bir ay ərzində Bakıda keçiriləcək Formula 1 yarışına beynəlxalq maraq olduqca artıb: “Yarışa üç ayın qaldığı bir zamanda biz rəsmi elçimiz Fernando Alonsonu Bakıda qonaq etdik. Bununla yanaşı İngiltərə, Rusiya və Türkiyədən onlarla tanınmış jurnalist eyni ərəfədə ölkəmizə səfər etdi. Həm Alonso, həm də jurnalistlər Bakı Şəhər Halqası ilə yaxından tanış oldular və görülən işlər haqqında öz xoş təəssüratlarını ifadə etdilər”.
Xatırladaq ki, akkreditasiya prosesi martın 31-i, saat 17:00-da başa çatacaq.
