Yığmamız Romanı fəth etməyə yollanacaq
6 yanvar 2014 11:33
2014-cü ilin 23 sentyabr-10 oktyabr tarixi aralığında İtaliyada voleybol üzrə qadınlar arasında dünya çempionatı keçiriləcək. Azerisport.az xəbər verir ki, mötəbər yarışda milli yığmamız ölkəmizin şərəfini qoruyacaq.
Faiq Qarayevin yetirmələri təsnifat mərhələsində uğurla çıxış edərək qrupda birinci yeri təmin edib DÇ-yə vəsiqə qazandılar. Həlledici oyunda hazırkı Avropa çempionu Serbiya yığması üzərində qələbə qazanmış millimiz tarixinin üçüncü mundialına qatılacaq.
Hazırda DÇ-nin 24 iştirakçısından 16-nın adı məlumdur: Milli yığmamızla yanaşı, Avropa təmsilçiləri: İtaliya, Rusiya, Almaniya, Türkiyə, Azərbaycan, Belçika, Xorvatiya, Bolqarıstan, Serbiya, Niderland; Asiya təmsilçiləri: Yaponiya, Tailand, Çin, Qazaxıstan; Cənubi Amerika təmsilçiləri: Braziliya, Argentina çempionluq mübarizəsində gücünü sınayacaq. Şimali Amerikadan altı, Afrikadan isə iki komandanın adına yaxınlarda aydınlıq gələcək.
Püşkatma iştirakçıların tam müəyyənləşməsindən sonra keçiriləcək. Ancaq bununla belə, bəzi qrupların tərkibi məlumdur. Yığmalar hər birində altı komanda olmaqla, dörd qrupda yarışacaq:
А qrupu: İtaliya, Almaniya;
В qrupu: Braziliya, Serbiya, Türkiyə;
С qrupu: Rusiya, Tailand;
D qrupu: Yaponiya, Çin.
İlk qrup mərhələsinin bütün oyunları Romada keçiriləcək.
Hər qrupdan dörd komanda növbəti mərhələyə vəsiqə qazanacaq. Növbəti mərhələ hər birində səkkiz komanda olmaqla, iki qrupdan ibarət olacaq. Komandalar ikinci mərhələyə bir-birinə qarşı oyunlarda yığdıqları xal ehtiyatı ilə başlayacaq.
İkinci qrup mərhələsinin oyunları Triest, Verona, Bari və Modenada keçiriləcək.
Üçüncü qrup mərhələsi hər birində üç komanda olmaqla iki qrupdan ibarət olacaq. İkinci qrup mərhələsinin üç ən yaxşı komandası bu mərhələnin iştirakçısı olacaq.
Üçüncü qrup mərhələsinin oyunları Milan, Triest, Verona və Baridə keçiriləcək.
Üçüncü qrup mərhələsində sonuncu yerləri tutmuş komandalar beşinci yer uğurda mübarizə aparacaq. Ən yaxşı iki komanda isə yarımfinal cütlərinin təşkil edəcək.
Pley-off oyunları və final qarşılaşması Milanda baş tutacaq.
