İlk yarımfinalçılar bəlli oldu
26 iyul 2012 19:26
Bakı Tennis Akademiyasında “Baku Cup-2012” beynəlxalq turniri davam edir. Azerisport.az xəbər verir ki, iyulun 26-da turnirin dördüncü gününün startı verilib.
Mərkəzi kortda ABŞ təmsilçisi Culiya Kohen Slovakiya tennisçisi Maqdalena Rıbarıkova ilə qarşılaşıb. İki saat 30 dəqiqə davam edən matçda qalib 3 setdə müəyyənləşib. İlk setdə 3:6 hesabı ilə məğlub olan C.Kohen ikinci setdə rəqibinin səhvlərindən istifadə edərək seti 6:4 hesabı ilə qələbə qazanıb. Üçüncü setdə də 6:4 hesabı ilə qələbə qazanan C.Kohen yarımfinala yüksəlib. 23 yaşlı tennisçi yarımfinalda Mendi Minella (Lüksemburq) və Olqa Puçkova (Rusiya) matçının qalibi ilə üz-üzə gələcək.
Ardından mərkəzi kortda iki serbiyalı - turnirin 5 nömrəli raketka ustası Boyana Yovanovski və 19 yaşlı gənc tennisçi Aleksandra Kruniç qarşılaşıblar. Maraqlı idman mübarizəsi şəraitində keçən oyunda B.Yovanovski 2:1 hesabı ilə qalib gəlib. Yarımfinala vəsiqə qazanan B.Yovanovskinin rəqibi iki rusiyalı tennisçi - Nina Bratçikova və Aleksandra Panova matçından sonra məlum olacaq.
Birinci kortda Varvara Flink (Rusiya) / Patrisiya Mayr-Axlaitner (Avstriay) cütlüyü Eva Birnerova (Çexiya) və Alberta Briyanti (İtaliya) dueti ilə üz-üzə gəlib. Bir saat davam edən matçda E.Birnerova/A.Briyanti cütlüyü çətinlik çəkmədən qələbə qazanıb – 2:0. Beləliklə, E.Birnerova/A.Briyanti qələbə sayəsində yarımfinala vəsiqə əldə edən ikinci cütlük olub.