Bakıda keçiriləcək birinci Avropa Oyunlarındakı idman növlərinin siyahısı açıqlandı
30 aprel 2013 16:26
Aprelin 30-da Avropa Olimpiya Komitəsinin (AOK) prezidenti Patrik Hikki və Azərbaycan gənclər və idman naziri Azad Rəhimovun birgə mətbuat konfransı keçirilib. Azerisport.az xəbər verir ki, tədbirdə çıxış edən gənclər və idman naziri Azad Rəhimov ölkəmizdə idmana göstərilən dövlət qayğısından danışıb və idmançılarımızın qazandığı nailiyyətləri yüksək qiymətləndirib.
Avropa Olimpiya Komitəsinin Koordinasiya Şurasının üzvlərinin ölkəmizdə olduğunu diqqətə çatdıran A.Rəhimov bu müddət ərzində respublikamızın idman infrastrukturunun təqdimatının keçirildiyini bildirib. Vurğulanıb ki, artıq qonaqlar Olimpiya kəndində idmançılar üçün yaradılmış şəraitlə tanış olub və burdakı şərait yüksək qiymətləndirilib. Ümumiyyətlə, birinci Avropa Oyunlarına hazırlıq yüksək səviyyədə davam edir.
Sonra Azərbaycanın turizm imkanlarından bəhs edə videoçarx nümayiş olunub.
Artıq 2015-ci ildə Bakıda keçiriləcək birinci Avropa Oyunlarının proqramına daxil olan idman növlərinin siyahısı da məlumdu. Birinci Avropa Oyunlarında iddiaçılar idmanın 19 növündə mübarizə aparacaqlar.
Belə ki, siyahıda kamandan oxatma, üzgüçülük, atletika, badminton, basketbol (3X3), boks, kanoe, velosiped, çimərlik futbolu, gimnastika, cüdo, karate, stend atıcılığı, stolüstü tennis, taekvondo, triatlon, çimərlik voleybolu, güləş və qılıncoynatma yer alıb.
