Mahir Şükürov: Neftçinin 2-3 oyunçusunun maaşı AZAL-ın illik büdcəsinə bərabərdir
"Neftçi"nin müdafiəçisi Mahir Şükürov Topaz Premyer Liqasının 14-cü turu çərçivəsində AZAL-a qarşı oyundan (0:1) sonra azerisport.az saytının da aralarında yer aldığı bir qrup jurnalistə müsahibə verib:
- Oyunla bağlı nə deyə bilərsiniz?
- Bu matça kənardan baxmaq çox çətin idi. Qol vurmaq, qalib gəlmək üçün şanslarımız da oldu. Amma bunu bəraət üçün demirəm. Məsələ burasındadır ki, AZAL-a qarşı oynayırdıq. Bizim 2-3 oyunçunun maaşı bu klubun illik büdcəsinə bərabərdir. Bax buna görə qələbə qazanmağa borclu idik. Bu, bağışlanmaz məğlubiyyətdir.
- Siz, Araz Abdullayev meydanda olsaydı, "Neftçi" qalib gələ bilərdi?
- Əlbəttə, hər şey fərqli olardı. Qarşıda "Zirə" ilə kubok oyunu var. Həmin görüşə hazırlaşmalıyıq.
- "Neftçi" ili sonuncu pillədə başa vurmamasına görə sevinə bilər?
- Bəli. Ümid edirəm ki, qış fasiləsindən sonra tam fərqli komanda olacağıq və qələbələrimizin də sayı çox olacaq.
- "Neftçi"nin kuboka kökləndiyini demək olar?
- Bəli. Orada daha yaxşı şansımız var. "Zirə"ni keçək, qışda güclənməliyik. Bu turnirdə uğur qazana bilərik.
- Komanda qışda çox dəyişməlidir?
- Təyyarə qəzasında heyətinin böyük hissəsini dəyişən Braziliyanın "Şapekopense" klubu kimi. Bizə 10-15 oyunçu lazımdır.
- Bu fasilə sizə kömək edəcək?
- Bu fasilənin mənə də köməyi olacaq. İndi 60-70 faiz hazıramsa, qışda tam hazır ola biləcəyəm. Qışdan sonra azarkeşlər də fərqli Mahir Şükürov görəcəklər.