Azərbaycan millisi Praqada iki qələbə qazandı
5 iyul 2013 23:18
Bu il iyulun 22-dən 28-dək Fransanın Camrai şəhərində Avropa çempionatında mübarizə aparacaq Azərbaycanın qadın otüstü hokkeyçilərdən ibarət milli komandası baş məşqçi Adil Paşayevin başçılığı altında yenidən Avropanın 8 ən güclüsü sırasına vəsiqə qazanmaq üçün ciddi hazırlıq keçir. Azerisport.az xəbər verir ki, bu məqsədlə millimiz iyunun 28-də təlim-məşq toplanışı və yerli hokkeyçilərlə bir-neçə yoxlama oyunu keçirmək üçün Polşaya, iyulun 3-dən isə Çexiyanın paytaxtı Praqaya gedib.
Praqadakı ilk sınaq oyununda millimiz Çexiya yığmasına 3:2 hesabı ilə qalib gəlib. Matçın birinci yarısında Anastasiya Tsqanskaya, Yuliya Muradi və Fəridə Məmmədovanın vurduqları qollardan sonra məşqçilər gənc hokkeyçiləri meydaçaya buraxıb və yerli hokkeyçilər bu fürsətdən istifadə edərək 2 top vurmaqla yalnız hesab arasındakı fərqi minimuma endirməyi bacarıblar. Dünən Bakı vaxtı ilə saat 22.00-da həmyerlilərimiz Çexiyada meydan sahibləri ilə növbəti yoxlama oyunu keçiriblər. Həmin qarşılaşmada 4 :0 hesaı ilə qələbə qazanan komandamızda Yuliya Muradi 3, Gülər Aydınlı isə 1 qolun müəllifi olub. İkitərəfli razılığa əsasən qadın hokkeyçilərimiz bu gün Avstriya təmsilçiləri ilə də 1 oyun keçirəcəklər.
Bundan sonra iyulun 7-də həmyerlilərimiz yerli hokkeyçilərlə daha 1 dəfə qarşılaşacaqlar. Bir daha xatırladırıq ki, həmyerlilərimiz Çexiya səfərindən əvvəl Poznan şəhərində Polşanın milli komandası ilə 3 yoxlama oyununda da qüvvələrini sınayıblar. Qadın hokkeyçilərimiz ilk görüşdə minimal hesabla məğlub olsalar da sonrakı qarşılaşmaları qələbə ilə başa vurublar. İyulun 8-də millimiz vətənə qayıdacaq və qitə çemionatına son hazırlığı Bakıda keçirəcəklər.
2013-cü il avqustun 5-dən 11-dək Avstriyanın paytaxtı Vyana şəhərində anoloji yarışda iştirak edəcək ölkəmizin kişi otüstü hokkeyçilərdən ibarət milli komandası da məsul yarışa hazırlığın növbəti mərhələsini Praqa şəhərində keçirir. Baş məşqçi Saleh Hüseynovun rəhbərlik etdiyi yığmamız da 2 gün əvvəl Çexiya təmsilçiləri ilə ilk sınaq qarşılaşmasında 4:3 hesablı qələbə qazanıb. Matçın I hissəsində 4:1 hesabı ilə irəlidə olan komandamızın heyətində fasilədən sonra ehtiyat oyunçulara şans verilib. Bu da oyunda özünü göstərib. Həmyerlilərimiz öz qapılarından 2 cavabsız top buraxsalar da minimal hesablı qələbəni əldən verməyiblər. Dünən kişi hokkeyçilərimiz qarşıdakı Avropa çempionatında eyni qrupda çıxış edəcəkləri rəqibi - Uels yığması ilə qarşılaşıb və 1:6 hesabı ilə uduzublar. Kişi otüstü hokkeyçilərimiz iyulun 6-da Çexiya təmsilçiləri ilə daha bir görüş keçirəcəklər.
