Ölkə çempionatının qalibləri mükafatlandırıldı
31 oktyabr 2012 16:28
Bakı Otüstü Hokkey Kompleksində kişilərdən ibarət komandalar da son turun oyunları ilə ölkə çempionatına yekun vurublar. Azerisport.az xəbər verir ki, əslində həmin görüşlərin nəticələri heç bir prinsipial əhəmiyyət kəsb etmirdi.
Belə ki, yarışların başa çatmasına 2 tur qalmış iştirakçı komandalar turnir cədvəlindəki yerlərini müəyyənləşdirmişdilər. İlk olaraq meydana vaxtından əvvəl “gümüş” medalları özünə təmin edən “Atasport” və çempionatın autsayderi - bir xal belə qazana bilməyən “Gənclik” (Sumqayıt) komandaları çıxıblar. Matç gözlənildiyi kimi təcrübəli paytaxt təmsilçilərinin deyil, sumqayıtlıların hücumları ilə başlayıb. 2-ci dəqiqədə Cavanşir Aslanlı “Gənclik” klubunu hesabda irəli çıxarıb. Lakin, əksəriyyətini yeniyetmə hokkeyçilərin təşkil etdiyi Sumqayıt təmsilçisinin qol vurmaq sevinci uzun çəkməyib. 2 dəqiqə keçmiş Mehman Orucov matçda tarazlıq yaradıb. Bundan sonra qol sevincini yaşayan yalız “Atasport” olub. Əli Nadirovun 3, Mehman Orucovunsa vurduğu daha 1 qolla komandalar fasiləyə yollanıblar. İkinci hissədə meydanda vəziyyət dəyişməyib. “Atasport” Aqil Məmmədov (2), Abbas Nəsirov və Əhməd Quliyevin rəqib qapısından keçirdikləri daha 4 topla 9:1 hesabı ilə qələbə qazanıb. Təqvim üzrə turun 2-ci oyunu da formal xarakter daşıyıb. Beləki, artıq ölkə çempionu adını özünə təmin edən “Akkord” və “bürünc” medalların sahibi “Şahdağ” (Qusar) komandaları qarşılaşıb. Həmin oyunda rəqiblər xal qazanmaq deyil, kimin güclü olmasına aydınlıq gətirmək istəyirdilər. Elə bu səbəbdən də komandalar yalnız hücum üslubunda oynayıblar. “Akkord” Rauf Şükürov və Saleh Balamiyevin vurduqları qollar sayəsində hesabda irəli çıxıb. Bundan sonra çempionlar bir qədər arxayınlaşıblar. Az vaxt ərzində Qusar hokkeyçiləri Rövşən Şıxəliyev və Fətulla Rzaxanovun (penalti) vurduqları qollar sayəsində rəqiblərini cəzalandıraraq hesabı bərabərləşdiriblər. Fasiləyə 2 dəqiqə qalmış Saleh Balamiyev “Akkord”u bir daha hesabda irəli çıxarıb. İkinci hissə başlayan kimi Anar Pirsaatov yenidən hesabda tarazlıq yaradıb. Ancaq bu, qusarlıların sonuncu qolu olub. Şirkət təmsilçiləri Aqşin Əliyev və Saleh Balamiyevin daha 1 qolu ilə 5:3 hesablı qələbəni rəsmləşdiriblər.
Matç başa çatandan sonra çempionatın mükafatlandırma mərasimi olub. “Akkord”a “qızıl”, “Atasport”a “gümüş”, “Şahdağ” komandasına isə “bürünc” medallar, müvafiq diplomlar və pul mükafatları təqdim olunub.Yarışın Təşkilat Komitəsi müxtəlif nominasiyalar üzrə fərqlənən hokkeyçiləri də mükafatlandırıb. Elman Eldarov(“Şahdağ”) çempionatın “Ən yaxşı oyunçusu”, Teymurşah Vəlibəyov (“Şahdağ”) “Ən yaxşı qapıçı”, Saleh Balamiyev (“Akkord”) rəqib qapılarından 32 qol keçirərək çempionatın “Ən sərrast hücumçu”su üçün təsis olunan mükafatlara sahib olublar.
